არასამთავრობო ორგანიზაციები დამკვირვებელთა ხელშეშლის ფაქტებზე სამართალდამცავებს რეაგირებას სთხოვენ. მათი თქმით, დამკვირვებლებზე ხელისშეშლის ფაქტები გამოვლინდა როგორც ადგილობრივი, ისე საერთაშორისო სადამკვირვებლო ორგანიზაციის წარმომადგენლების მიმართ.
NGO-ები ასევე მოუწოდებენ ცესკოს, მიიღონ ზომები საარჩევნო ადმინისტრაციის წარმომადგენლების მიმართ, რომლებმაც ხელი შეუშალეს დამკვირვებლებს საარჩევნო პროცესში. არასამთავრობო ორგანიზაციების წარმომადგენლები საუბრობენ საარჩევნო კომისიის წევრთა არაპორფესიონალიზმზე, რის გამოც მოხდა ბევრი დარღვევა.
„სადამკვირვებლო ორგანიზაციები გამოვხატავთ შეშფოთებას 8 ოქტომბერს, საპარლამენტო არჩევნების კენჭისყრის დღეს, დამკვირვებელთა ხელის შეშლისა და მათთვის სიტყვიერი და ფიზიკური შეურაცხყოფის ფაქტების თაობაზე. მოვუწოდებთ შეაბამის ორგანოებს, დროულად მოახდინონ რეაგირება და ეფექტურად წარმართონგამოძიება ძალადობრივ ინციდენტებში მონაწილე პირთა დასადგენად“- ნათქვამია განცხადებაში.
„სადამკვირვებლო ორგანიზაციების მუშაობა და უსაფრთხოება არის ინდიკატორი, როგორ ტარდება არჩევნები, ამიტომ ძალიან მნიშვნელოვანია განმეორებით არჩევნებზე, მეორე ტურზე და ყველა სხვა არჩვნებზე შესაბამისმა უწყებებმა მიიღოს მაქსიმალური ზომები, რათა დამკვირვებლებმა უსაფრთხო პირობებში იმუშაონ“.- განაცხადა ანა ნაცვლიშვილმა.
საერთო განცხადებას ავრცელებენ ორგანიზაციები:
ადამიანის უფლებათა ცენტრი;
საქართველოს ახალგაზრდა იურისტთა ასოციაცია;
საზოგადოებრივი დამცველი;
„მრავალეროვანი საქართველო“;
სამართლიანი არჩევნებისა და დემოკრატიის საერთაშორისო საზოგადოება;
სამოქალაქო კულტურის საერთაშორისო ცენტრი;
განვითარებისა და დემოკრატიის ცენტრი;