ხვალ ზუგდიდის რაიონის 79-ე,108-ე (ჯიხაშკარი) და 38-ე (განმუხური) საარჩევნო უბნებზე კენჭისყრა განმეორებით გაიმართება.

განმეორებითი არჩევნები გაიმართება,ასევე, მარნეულში, 36-ე ოლქის 48-ე საარჩევნო უბანზე.

ზუგდიდის რაიონში „ნაციონალური მოძრაობის" კანდიდატმა, სანდრა რულოვსმა 10 254 ხმა მიიღო, ხოლო „ქართული ოცნების" კანდიდატმა ედიშერ თოლორაიამ  - 10 626.

მარნეულში „ერთიანი ნაციონალური მოძრაობის“ კანდიდატმა, აკმამედ იმამკულიევმა 9 645 ხმა მიიღო, ხოლო „ქართული ოცნების“ კანდიდატმა თამაზ ნავერიანმა - 8 738.

რაც შეეხება, ამომრჩეველთა რაოდენობას - ზუგდიდის 38-ე უბანში 1145 ამომრჩეველია რეგისტირებული, ზუგდიდის 79-ე უბანში - 925 და ზუგდიდის 108-ე უბანში - 774, მარნეულის 48-ე უბანზე კი - 1436 ამომრჩეველი. 

8 ოქტომბერს ჯიხაშკარში ორივე საარჩევნო უბანი არჩევნების ღამეს დაარბიეს.

შსს-ს ცნობით, სამეგრელოში, ზუგდიდის რაიონის სოფელ ჯიხაშკარში პირთა ჯგუფი 79-ე საარჩევნო უბანზე შეიჭრა. მათ საარჩევნო ყუთი გატეხეს, მინები ჩაამსხვრიეს, ინვენტარი დააზიანეს და დამკვირვებლების კუთვნილი მობილური ტელეფონები გაიტაცეს. 

აღნიშნულ ფაქტთან დაკავშირებით, შსს-მ გამოძიება სსკ-ს 162-ე პრიმა (კენჭისყრის შენობაში, საარჩევნო კომისიის განთავსების ადგილას ან მათ მიმდებარე ტერიტორიაზე, ან წინასაარჩევნო აგიტაციის ან წინასაარჩევნო კამპანიის ღონისძიების დროს ძალადობა ან ძალადობის მუქარა) და 163-ე მუხლებით (საარჩევნო ან სარეფერენდუმო კომისიის მუშაობისათვის ხელის შეშლა) დაიწყო. მომხდართან დაკავშირებით დაკავებულია 2 პირი.

რაც შეეხება მარნეულს, 14 ოქტომბერს რუსთავის საქალაქო სასამართლომ ინციდენტში ბრალდებულ ექვსივე პირს აღმკვეთი ღონისძიების სახით წინასწარი პატიმრობა შეუფარდა.