საქართველოს პრეზიდენტი გიორგი მარგველაშვილი ჯარისკაცის დაღუპვის გამო, მწუხარებას გამოთქვამს. „მწუხარებას გამოვთქვამ სოფელ ბოდბის მიმდებარე ტერიტორიაზე სამხედრო ავტომობილის ავტოკატასტროფის გამო. ამ უმძიმეს წუთებში ვიზიარებ გარდაცვლილი ჯარისკაცის ოჯახის წევრებისა და ახლობლების მწუხარებას და თანადგომას ვუცხადებ მათ. დაშავებულ სამხედრობს მალე გამოჯანმრთელებას ვუსურვებ”, - ნათქვამია გიორგი მარგველაშვილის განცხადებაში, რომელსაც პრეზიდენტის ადმინისტრაცია ავრცელებს.

სოფელ ბოდბის მიმდებარე ტერიტორიაზე, სამხედრო ავტომანქანის ავტოავარიის შედეგად, ჯარისკაცი გარდაიცვალა. თავდაცვის სამინისტროში აცხადებენ, რომ უწყების კუთვნილ, „კამაზის” მარკის ავტომანქანაში 37 სამხედრო მოსამსახურე იჯდა. დაღუპულია ერთი სამხედრო მოსამსახურე, დანარჩენები კი მსუბუქი დაზიანებებით დედოფლისწყაროს საავადმყოფოში გადაიყვანეს.

დედოფლისწყარო-სიღნაღი-თბილისის დამაკავშირებელ ავტომაგისტრალზე, სოფელ ბოდბეს მიმდებარე ტერიტორიაზე, ჯარისკაცებით სავსე სამხედრო მანქანის გადაბრუნების საქმეზე გამოძიება საქართველოს სისხლის სამართლის კოდექსის 276-ე მუხლის მე-5 ნაწილით მიმდინარეობს, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც ადამიანის სიცოცხლის მოსპობა გამოიწვია.