შპს „თბილსერვის ჯგუფი” თბილისში მიწისქვეშა კონტეინერების განთავსებას გეგმავს. მიწისქვეშა კონტეინერები მოცულობით არსებულ ურნებზე გაცილებით დიდი იქნება და მისი დაცლა 2-3 დღეში ერთხელ იქნება საჭირო. „თბილსერვის ჯგუფის“ დირექტორის პირველმა მოადგილემ, დავით დოლიძემ „ლიბერალთან“ საუბარში განაცხადა, რომ საჭირო თანხას ახალი კონტეინერების განსათავსებლად შემდეგი წლის ბიუჯეტში გაითვალისწინებენ.
„თუ პატარა ურნებს დღეში 1-2-ჯერ სჭირდება დაცლა, ის მოცულობით უფრო დიდი იქნება და 2-3 დღეში ერთხელ დასჭირდება დაცლა. ეს ევროპაში ყველგან არის აპრობირებული, მაგრამ ისეთ ადგილებშია კარგი, სადაც უფრო პარკინგის ან გაჩერების პრობლემაა, უფრო მეტი მანქანა მოძრაობს და ა.შ. ისეთ ადგილებში, სადაც ყოველ დღე ვერ მიდის მანქანა ურნების დასაცლელად“, - ამბობს დავით დოლიძე.
როგორც დავით დოლიძე ამბობს, ერთი კონტეინერის მოწყობის ფასი დაახლოებით 10-15 ათასი ევრო იქნება. მისივე თქმით, ჯერ უცნობია, რამდენ კონტეინერს მოაწყობენ. ნოემბრის ბოლოს კი საჭიროების მიხედვით ქალაქის რამდენიმე წერტილს შეარჩევენ.
შპს „თბილსერვის ჯგუფი“ 2007 წელს თბილისის მთავრობის მიერ 100%-იანი წილობრივი მონაწილეობით დაფუძნებული კომპანიაა. კომპანია დედაქალაქში დაგვა-დასუფთავებასთან ერთად, მუნიციპალიტეტის საკუთრებაში არსებულ მიწისქვეშა გადასასვლელებზე, შადრევნებზე გამწვანებული ტერიტორიების ნაწილსა (პარკები, ბაღები) და გარე განათებაზეა პასუხისმგებელი.