2016 წლის 23 ოქტომბერს წვრთნებისა და სამხედრო განათლების მხარდამჭერ ცენტრში  შეჭრისას დაღუპული გიორგი შენგელიას მამა „რუსთავი 2-თან“ აცხადებს, რომ მის შვილს იარაღი არასდროს ჰქონია. მისი თქმით, გარდაცვლილი 3 საათის შემდეგ იპოვეს. მას ტყვია უკნიდან  აქვს მოხვედრილი.

„გამოიძიონ სწორად, როგორც არის საჭირო. იარაღი ჩემს შვილს არასდროს არ ჰქონია, ყაჩაღი არასდროს ყოფილა, ნასამართლევი არ არის და ახლა თუ მეგობრის სანახავად მივიდნენ, ეს არ ვიცი. გაარკვევს, ალბათ, გამოძიება. მეორე შვილი მასთან ერთად თბილისში იყო წასული. ის იმ დროს მასთან ვერ იქნებოდა.

თუ სროლა იყო და კაცი მოკლეს, რატომ არ მოძებნეს. სამი საათი იქ რომ ეგდო და სისხლისგან დაიცალა ბიჭი და მერე რომ ნახეს, მანამდე სად იყვნენ, თუ სროლა იყო. ხომ ატყდა სროლა, ნაწილში განგაში ხომ უნდა ყოფილიყო. თუ ვიღაცა შემოგივარდა, ხომ უნდა მოძებნო. ტყვია უკანა მხარეს აქვს. კაცი გაქცევაზეა და ტყვიას რომ ესვრი, რა ჯიშის უნდა იყო.

ახლა „პულიმიოტი" ჰქონია გიგას და ესროლა, ალბათ. იარაღი ნანახი კი ექნებოდა, მაგრამ ეგ არ არსებობს“, - აცხადებს გარდაცვლილი გიორგი შენგელიას მამა რომან შენგელია.