კრწანისის ბაზაზე მოკლული გიორგი შენგელიას მამის თქმით, იმ პირებს ესაუბრა, რომლებიც შემთხვევის დროს მოკლულთან ერთად იმყოფებოდნენ. როგორც მან აღნიშნა, მისი შვილი ბაზაზე მეგობრის სანახავად მივიდა.

„ტყვია გარეთ ესროლეს, გარეთ იყო ბავშვი გასული. გადახტა ღობეზე, 20 მეტრის მანძილზეა მოკლული ბავშვი. როგორც აცხადებენ 90-100 მეტრის მანძილზე იპოვეს. 100 მეტრი კი არა 20 მეტრში ეგდო. რატომ არ ნახეს? 4 საათის განმავლობაში 20 მეტრში ვერ მოიძებნა ბავშვი" - ამბობს გიორგი შენგელიას მამა.

მისი თქმით, ეს არ იყო პირველი შემთხვევა, როცა მისი შვილი ბაზაზე მეგობრის სანახავად მივიდა. 

„იქ გადასვლა-გადმოსვლა მოსულია თურმე. არ არის დაცული ბაზა, აბა როგორ უნდა გადავიდნენ ბავშვები. ხომ უნდა იყოს დაცული. კამერები არ მუშაობს, არაფერი არ მუშაობს, იციან ბავშვებმა და ხტებიან იქეთაც და აქეთაც. სამნი იყვნენ, მეორე შვილი მე არც ვიცი სად არის და თვითონ ეძებენ და მოძებნონ. მეორე შვილთან რა უნდათ, ვინც იყვნენ, ისინი მოძებნონ. სამნი ხომ იყვნენ, ორი იყო ერთ მხარეს გაჩერებული, ერთი, ჩემი გიგა მეორე მხარეს. გიგასთან ჰქონდა მას მხედველობა გამახვილებული და გიგას უთქვამს ქართველები ვართ ბიჭო და ნუ მესვრიო და ამის მერე გადახტა გიგა ღობეზე და 20-25  მეტრი, მაქსიმუმ 30 და მერე მოხდა ორი გასროლა" - ამბობს შენგელია.

მისი თქმით, მის შვილს პოსტზე მეგობარი უნდა დახვედროდა, თუმცა სხვა დახვდა. 

„საუბედუროდ ეს დახვდა. სხვა განზრახვა რა უნდა ჰქონოდათ, სამხედრო ბაზაა, ბანკი ხომ არ იყო საყაჩაღოდ რომ წასულიყვნენ. პროზექტურაში ჩემი ძმა და ჩემი ნათესავები რომ წავიდნენ ბავშვის ჩამოსასვენებლად ბავშვი არ იყო, ორი საათი სად ჰყავდათ“.- განაცხადა გიორგი შენგელიას მამამ „რუსთავი 2-თან" საუბარში.