თბილისის საქალაქო სასამართლომ „პატრიოტთა ალიანსის" სარჩელი არ დააკმაყოფილა. პარტიამ სასამართლოში სარჩელი რამდენიმე დღის წინ შეიტანა. გადაწყვეტილება მოსამართლე თამარ ოქროპირიძემ რამდენიმე წუთის წინ გამოაცხადა.
„პატრიოტთა ალიანსი“ ცესკოს შემაჯამებელი ოქმის ბათილად ცნობას მოითხოვს. „პატრიოტთა ალიანსს“ ცესკომ ექვსი სადეპუტატო მანდატი მიაკუთვნა. თუმცა, ისინი მიიჩნევენ, რომ მანდატების ამგვარი გადანაწილება კონსტიტუციას ეწინააღმდეგება. მათი თქმით, პარტიას მეტი მანდატი ეკუთვნის, ვინაიდან 5%-იანი ბარიერის მიღმა დარჩენილი პარტიების მანდატები თანაბრად უნდა გადანაწილდეს პარლამენტში შესულ ყველა პარტიაზე.
„პატრიოტთა ალიანსის“ პოლიტიკური მდივნის, გოჩა თევდორაძის თქმით, ისინი გადაწყვეტილებას სააპელაციო სასამართლოში გაასაჩივრებენ, რადგან საქალაქო სასამართლოს მიერ მიღებული გადაწყვეტილება უსამართლოა.