ევროპარლამენტი თურქეთს მოუწოდებს, გაათავისუფლოს ჟურნალისტები, რომლებიც კრიმინალური აქტივობის აშკარა მტკიცებულების გარეშე არიან დაკავებულნი. ამის შესახებ ნათქვამია ევროპარლამენტის რეზოლუციაში, რომელიც დეპუტატებმა გუშინ მიიღეს.
15 ივლისის გადატრიალების მცდელობის შემდეგ თურქეთის მთავრობამ სულ მცირე 99 ჟურნალისტი დააკავა, 330-მდე ჟურნალისტს უფლებამოსილება შეუჩერა და 100-მდე მედიაორგანიზაცია დახურა, რის შედეგადაც 2 300-მდე ჟურნალისტი უმუშევარი დარჩა.
„დაუშვებელია ჟურნალისტის დაკავება მათი საქმიანობის გამო" - ამბობენ დეპუტატები, რომლებიც მთავრობას უტყუარი მტკიცებულების გარეშე დაკავებული ჟურნალისტების გათავისუფლებისკენ მოუწოდებენ.
„გადატრიალების მცდელობის შედეგად დაკავებულ ჟურნალისტებს არ ეძლევათ ადვოკატის ნახვის საშუალება და იმყოფებიან არაჰუმანურ პირობებში, სადაც ისინი არასათანადო მოპყრობისა და მუქარის ქვეშ არიან" - ამბობენ დეპუტატები.
