ყოფილი პრემიერის, ტონი ბლერის თქმით, დიდმა ბრიტანეთმა ევროკავშირიდან გასვლის ალტერნატივა არ უნდა გამორიცხოს, რაც, შესაძლოა, რეფერენდუმის ხელმეორედ გამართვასაც ნიშნავდეს.
BBC-სთან საუბარში ბლერმა აღნიშნა, რომ რეფერენდუმის შედეგი კატასტროფაა და აუცილებელია იმ შედეგების კვლევა, რომლებიც შესაძლოა, Brexit-მა გამოიწვიოს.
მისი თქმით, ივნისში გამართული რეფერენდუმის გადაწყვეტილება მისაღებია, თუმცა ბრიტანეთმა კიდევ ერთხელ უნდა შეხედოს პროცესს, როდესაც უკეთ ეცოდინება, თუ საით მიემართება.
რეფერენდუმში, რომელიც ივნისში ჩატარდა, მოსახლეობის 51,9%-მა მხარი ევროკავშირიდან გასვლას დაუჭირა.
დეპუტატი UKIP-ის პარტიიდან, დუგლას კარსველი მიიჩნევს, რომ ბლერი რეფერენდუმის დელეგიტიმაციას ცდილობს.
Brexit-ის მხარდამჭერები მიიჩნევენ, რომ ევროკავშირიდან გასვლა ბრიტანეთს საერთაშორისო სავაჭრო ასპარეზზე უფრო თავისუფლად მოქმედებისა და მიგრაციის უკეთ კონტროლის საშუალებას მისცემს.