„ინტერპრესნიუსის“ ცნობით, „ერთიანი ნაციონალური მოძრაობის” წევრი მიხეილ მაჭავარიანი პოლიტიკურ ტაიმაუტს იღებს. მაჭავარიანის თქმით, ის პოლიტიკური საქმიანობისგან შეისვენებს, მაგრამ პარტიის წევრად და აქტიურ მხარდამჭერად დარჩება.
„ვიღებ პოლიტიკურ ტაიმაუტს, თუნდაც, რომ მომიწიოს შესვლა პარლამენტში, ვერ ვხედავ რესურსს ის საქმე გავაკეთო, რაც მე მაინტერესებს. ეს პარლამენტი ეკონომიკაში არაფერს შეცვლის. რა ეკონომიკური საკითხებიც არ უნდა წამოგვეწია, გვპასუხობდნენ, რა დროს ეკონომიკაა, ყველაფერი კარგად არისო. 27 ადამიანი შედის ჩვენგან პარლამენტში, ვიბრძვით მაჟორიტარებისთვის და თუ მოგვიწია კიდევ შესვლა, უმჯობესია, ახალი ადამიანები შევიდნენ, ვისაც მეტი გამოწვევა ექნება. პარტიულ თანამდებობაზე არც ვარ. რაღაც საკითხებზე ვიქნები აქტიური, გავაქტიურდები „ფეისბუქზეც”. შესაძლოა, პარტიის სახელით აღარ გავაკეთოთ ბრიფინგები, თუმცა დავეხმარები და მხარს დავუჭერ, რადგან ძალიან კარგი ხალხია ამ პარტიაში და ერთი მსოფლმხედველობა გვაქვს”, - განუცხადა მაჭავარიანმა „ინტერპრესნიუსს“
მიხეილ მაჭავარიანი ამბობს, რომ მომავალ საპარლამენტო არჩევნებამდე მისთვის პოლიტიკური საქმიანობა საინტერესო არ იქნება.