სოფელ მოხის სადავო შენობის წარმომავლობის დამდგენი კომისიის გადაწყვეტილებით, მოხეში, სოფლის ცენტრში მდგარი სადავო შენობა არც ერთ მხარეს არ გადაეცემა.
„ადიგენის მუნიციპალიტეტის სოფელ მოხეში მდებარე კლუბის სტატუსით რიცხულ შენობასთან დაკავშირებით არსებული გარემოებების შემსწავლელი კომისიას" ნაგებობის წარმომავლობა არ შეუსწავლია მიუხედავად იმისა, რომ იგი სწორედ ამ მიზნით შეიქმნა. კომისიას უნდა დაედგინა, არის თუ არა ნაგებობა ისტორიულად მეჩეთი და არის თუ არა ის ეკლესიის ქვებით აშენებული.
დღეს, 3 ნოემბერს, სამცხე–ჯავახეთის სამხარეო ადმინისტრაციაში, სოფელ მოხის სადავო შენობის წარმომავლობის დამდგენი კომისიის სხდომა გაიმართა.
ნიკოლოზ ანთიძის თქმით, ადგილობრივ მუსლიმ მოსახლეობას ორ ალტერნატივას შესთავაზებენ: სახელმწიფო გამოისყიდის შენობას, სადაც აქამდე მუსლიმები ლოცვას აღავლენენ და ამ შენობას გადასცემენ მუსლიმთა სამმართველოს, ან სახელმწიფო შეისყიდის მიწას და თავისივე სახსრებით ააშენებს მეჩეთს.
ხოლო რაც შეეხება სადავო შენობას, ნიკოლოზ ანთიძის თქმით, სააგენტომ აიღო ვალდებულება, უახლოეს პერიოდში მოამზადოს შენობის დაცულობისა და ფუნქციური დატვირთვის კონცეფცია.
შეკითხვაზე, თუ რა ფუნქცია შეიძლება ჰქონდეს ამ შენობას მომავალში, ნიკოლოზ ანთიძემ გვიპასუხა, რომ მას არ ექნება რელიგიური დატვირთვა. „თუ რა ფუნქცია ექნება შენობას, ამაზე ვიმსჯელებთ. შესაძლოა, იყოს კულტურულ-საგანმანათლებლო. თუმცა ყველაფერი ჯერ იდეის დონეზეა“ - ამბობს ანთიძე.
იმსჯელა თუ არა კომისიამ შენობის ისტორიულ წარმომავლობაზე და გეგმავს თუ არა სააგენტო მომავალში ამის შესწავლას - როგორც ანთიძემ „ლიბერალს“ განუცხადა:
„არა, სააგენტო ისტორიულ კვლევას არ გეგმავს. კომისია შეთანხმდა, რომ რომ არც ერთ მხარეს არ გადაეცემა სადავო შენობა. ნაეკლესიარზე აშენდა თუ მეჩეთი იყო, ამაზე აღარც იქნება მსჯელობა, უბრალოდ მომავალ ფუნქციაზე იქნება საუბარი და მის დაცულობაზე.“.
მისივე თქმით, ყველაზე მნიშვნელოვანი იყო დაპირისპირების აღმოფხვრა, რომ ადგილობრივ მუსლიმებს იქ ლოცვის შესაძლებლობა ჰქონოდათ.
