ე.წ. „მოხის კომისიის“ გადაწყვეტილებას სადავო შენობასთან დაკავშირებით კომისიის წევრები განსხვავებულად განმარტავენ.
სრულიად საქართველოს მუსლიმთა სამმართველოში ამბობენ, რომ დღეს კომისიას ე.წ. სადავო შენობის ვინმესთვის გადაცემის ან არ გადაცემის შესახებ არ უმსჯელია და სხდომაზე მხოლოდ ადგილობრივი მუსლიმი თემის ლოცვასთან დაკავშირებულ პრობლემაზე იმსჯელეს. სამმართველოს ხელმძღვანელის მოადგილე ადამ შანთაძე ამბობს, რომ სადავო ნაგებობასთან დაკავშირებით კომისიას არავითარი გადაწყვეტილება არ მიუღია.
ნიკოლოზ ანთიძე კი, რომელიც კომისიის წევრია და ასევე საქართველოს კულტურული მემკვიდრეობის ძეგლთა დაცვის სააგენტოს ხელმძღვანელი, „ლიბერალთან“ საუბრისას ამბობს, რომ დღეს კომისიამ ორი გადაწყვეტილება მიიღო: პირველი გადაწყვეტილება ე.წ. სადავო შენობას ეხება. ანთიძე ამბობს, რომ კომისიის გადაწყვეტილებით, ეს შენობა არც ერთ მხარეს არ გადაეცემა და მისი განვითარების გეგმაზე პასუხისმგებლობა ძეგლთა დაცის სააგენტომ აიღო, რაც ნიშნავს იმას, რომ უახლოეს მომავალში სააგენტო ამ შენობის დაცვისა და განვითარების გეგმას შეიმუშავებს. ანთიძე კატეგორიულად ამბობს, რომ შენობის დანიშნულება რელიგიური არ იქნება და მისი რომელიმე კონფესიისთვის გადაცემის საკითხი მომავალში დღის წესრიგში არ დადგება.
„ე.წ. სადავო შენობასთან დაკავშირებით სააგენტომ აიღო ვალდებულება, რომ სამომვალო განვითარების კონცეფცია წარუდგინოს კომისიას. არც ერთი რელიგიური კონფესიისთვის მიკუთვნების საკითხი არ დადგება დღის წესრიგში“ - ამბობს ანთიძე.
თავად რელიგიის საკითხთა სახელმწიფო სააგენტოს ხელმძღვანელი ზაზა ვაშაყმაძე შეკითხვაზე, მიიღო თუ არა კომისიამ დღეს გადაწყვეტილება, რომ ე.წ. სადავო შენობა არც ერთ მხარეს არ გადაეცემა, პასუხს არ გვცემს და ამბობს, რომ ამ საკითზე მნიშვნელოვანი ადგილობრივი მუსლიმი თემისთვის ლოცვის პრობლემის მოგვარებაა.
ორი წლის წინ სოფელ მოხეშ მცხოვრები ქრისტიანი და მუსლიმი თემი ერთამენთს სადავო ნაგებობად წოდებული შენობის გამო დაუპირისპირდა. მუსლიმები აცხადებენ, რომ ნაგებობა ისტორიულად მეჩეთია, ამიტომ მუსლიმ თემს უნდა გადაეცეს, ადგილობრივი ქრისტიანები კი ამას ეწინააღმდეგებიან, რადგან, მათი თქმით, ნაგებობა ეკლესიის ქვებით არის აშენებული.
რელიგიის საკითხთა სახელმწიფო სააგენტოს ფარგლებში ორი წლის წინ კომისია შეიქმნა, რომელსაც ნაგებობის წარმომავლობა უნდა დაედგინა. იმის გამო, რომ ეს დაახლოებით ორი წლის განმავლობაში ვერ მოხერხდა, მუსლიმებმა ნაგებობაში ლოცვა აღავლინეს. მოგვიანებით, ადგილობრივი სასულიერო პირების განცხადებით, ამან ქრისტიანი მოსახლეობის პროტესტი გამოიწვია. შედეგად, პოლიციამ მოხის ნაგებობის კარი და ფანჯრები აჭედა.
მოხელი მუსლიმების შეუცვლელი მოთხოვნა
პოლიციამ მოხეში სადავო ნაგებობის კარი ჩახერგა - შსს: კანონის შესაბამისად ვმოქმედებთ
ევროსასამართლომ მოხეში მუსლიმების უფლებების დარღვევის ფაქტზე განაცხადი წარმოებაში მიიღო
