„მივმართავთ საქართველოს მომავალ  პარლამენტსა და მთავრობას და მოვითხოვთ, ახალ წლამდე შეცვალონ ნარკოტიკებთან დაკავშირებული კანონმდებლობა და მარიხუანის და მისგან დამზადებული პროდუქტების მოხმარება ქვეყანაში სრულად ლეგალიზებული გახდეს. ასევე, ლეგალიზებული იყოს მარიხუანის პირადი მოხმარების მიზნით კულტივირება და შენახვა". ამბობს ზურაბ ჯაფარიძე.

მისი თქმით, წინააღმდეგ შემთხვევაში, „2016 წლის 31 დეკემბერს, 23:59 საათზე  „გირჩის“ წევრები, „გირჩის“ ოფისში, პირდაპირ ეთერში, საჯაროდ, ნებისმიერ სრულწლოვან მოხალისესთან ერთად დავრგავთ მარიხუანას”.

„გირჩის" განცხადებით, პოლიტიკური ცენტრის შექმნის აზრი თავიდანვე იყო თავისუფლებისთვის „ბრძოლა და თავისუფლება ჩვენთვის იწყება ადამიანის უფლებით, იყოს საკუთარი სხეულის სრული ბატონ-პატრონი და განკარგოს ის ისე, როგორც მოესურვება", ამ უფლების გარეშე კი  არ არსებობს ადამიანის არანაირი სხვა უფლება და შეუძლებელია თავისუფალი საზოგადოების მშენებლობა.

„გირჩი, ისევე როგორც არაერთი სხვა სოციალური ჯგუფი, წლების განმავლობაში იბრძვის ნარკოპოლიტიკის ცვლილებისთვის. მათ შორის, ჩვენ გამოვიყენეთ ჩვენს ხელთ არსებული ყველა ბერკეტი დღევანდელ პარლამენტში, რომ შეგვეცვალა დღევანდელი ნარკოპოლიტიკა, თუნდაც პატარა ნაბიჯი მაინც გადაგვედგა წინ. მაგრამ, სამწუხაროდ უშედეგოდ, რადგან წავაწყდით უმრავლესობის ჯიუტ ნებას, რომ შეენარჩუნებინათ ეს დრაკონული და ჩვენი აზრით სრულიად იდიოტური და მავნებლური კანონმდებლობა, რომელიც დღეს აქვს საქართველოს. ამ კანონმდებლობამ ცხოვრება გაუმწარა საქართველოში ასობით ადამიანს" - ნათქვამია „გირჩის" განცხადებაში.