სახალხო დამცველი ჭიათურის მაღაროში დასაქმებულის დაღუპვისშესახებ განცხადებას ავრცელებს. როგორც განცხადებაშია ნათქვამი, აუცილებელია უსაფრთხოების წესების დაცვასთან დაკავშირებით სრულყოფილი რეგულაციების მიღება და მათი შესრულების მკაცრი მონიტორინგი, რომელიც მინიმუმადე შეამცირებს სამუშაო ადგილებზე დაშავებულთა და დაღუპულთა რაოდენობას.
„სახალხო დამცველი მოუწოდებს სამართალდამცავ ორგანოებს, ჩაატაროს სწრაფი და ეფექტიანი გამოძიება ადამიანის სიცოცხლის მოსპობის ფაქტზე, რაც შესაძლოა გამოწვეული იყოს სამთო-სამშენებლო ან სხვა სამუშაოს წარმოებისას უსაფრთხოების წესის დარღვევით.
სახალხო დამცველი ასევე მოუწოდებს საქართველოს მთავრობას, დაუყონებლივ დაიწყოს კონკრეტული ქმედითი ღონისძიებები შრომის უსაფრთხოების უზრუნველყოფის მიზნით, დასაქმებულთა ჯანსაღი და უსაფრთხო გარემოთი უზრუნველყოფისათვის შრომის საერთაშორისო ორგანიზაციის N81 კონვენციის (შრომის ინსპექციის შესახებ), N129 კონვენციის (სოფლის მეურნეობაში შრომის ინსპექციის შესახებ), N155 კონვენციისა (შრომის უსაფრთხოებისა და ჰიგიენის შესახებ) და ევროპის სოციალური ქარტიის მე–3 მუხლის (უსაფრთხო და ჰიგიენური სამუშაო პირობებით სარგებლობის უფლება) რატიფიცირების პროცესი.
ჭიათურის მაღაროში მომხდარი უბედური შემთხვევა კიდევ ერთხელ უსვამს ხაზს სამუშაო ადგილებზე შრომის უსაფრთხოების პრობლემების სიმწვავეს“,- ნათქვამია განცხადებაში.
გუშინ ჭიათურაში, ითხვისის მაღაროში ელმავლის მემანქანე, 53 წლის პაატა ღავთაძე დაიღუპა.
როგორც „ლიბერალთან“ საუბრისას ჭიათურის პირველადი პროფკავშირული ორგანიზაციის თავმჯდომარის მოადგილე პაატა სამხარაძე ამბობს, ელმავლის მემანქანე მაღაროდან მარგანეცით დატვირთული ვაგონებით გამოდიოდა. ამ დროს მან ელმავლიდან თავი გამოყო და გვერდით მდგომ ცარიელ ვაგონებს დაეტაკა.
პროფკავშირების წარმომადგენელი აღნიშნავს, რომ ელმავლის მემანქანეებს არ ჰყავთ დამხმარეები, რომლებიც მათ ელმავლის მართვაში დაეხმარება.
როგორც „ლიბერალს“ შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას ითვალისწინებს.