ავტომობილი, რომლის ტრანსპორტირებაც 1 დეკემბრამდეა დაწყებული, დაიბეგრება არსებული განაკვეთით. ამის შესახებ ნათქვამია საგადასახადო კოდექსის ცვლილებების პროექტში.

„საგადასახადო კოდექსის 309-ე მუხლს ემატება მე-100 ნაწილი, რომლის თანახმად, გარდამავალ პერიოდში მსუბუქი ავტომობილები დაიბეგრება აქციზის განაკვეთების ცვლილებამდე არსებული განაკვეთით, თუ შეძენილი ავტომობილის ტრანსპორტირება დაწყებულია არაუგვიანეს 2016 წლის 1 დეკემბრისა", - ნათქვამია კანონის პროექტში. 

სსკ-ის 188-ე მუხლში იცვლება მე-4 გრაფა, რაც მსუბუქ ავტომობილებზე აქციზის განაკვეთის ზრდას ითვალისწინებს.

ამასთან, მარჯვენასაჭიან მსუბუქ ავტომობილებზე (ცხრილში მითითებული იმავე კატეგორიის მიხედვით) აქციზის განაკვეთი გასამმაგდება.

ასევე, გარემოს დაცვითი პოლიტიკის გათვალისწინებით 0-დან 6 წლის ჩათვლით მსუბუქი ავტომობილებისათვის საგადასახადო კოდექსით განსაზღვრული აქციზის განაკვეთები ჰიბრიდული მსუბუქი ავტომობილების შემთხვევაში შემცირდება 60 პროცენტით, ნაცვლად დღეს არსებული 50 პროცენტისა.