მე ვფიქრობ, რომ ჩვენ გაცილებით უფრო ინოვაციურ და მნიშვნელოვან ტრეინინგებზე უნდა გავაკეთოთ აქცენტი, რაც უკეთესი შედეგის მომტანი იქნება, ვიდრე ეტიკეტის და პროტოკოლის ტრეინინგია, - ამის შესახებ თბილისის მერმა დავით ნარმანიამ დღეს დედაქალაქის მთავრობის სხდომაზე განაცხადა, რითაც მერიაში ეტიკეტთან და პროტოკოლთან დაკავშირებით ჩასატარებელ ტრეინინგებს გამოეხმაურა.
მან მერიის თანამშრომლებს მოუწოდა, მეტი ყურადღებით იყვნენ, როცა თანამშრომელთა გადამზადების ტრეინინგებს გეგმავენ.
„მე ვფიქრობ, რომ ჩვენ გაცილებით უფრო ინოვაციურ და მნიშვნელოვან ტრეინინგებზე უნდა ავიღოთ აქცენტი და ალბათ, ამ შემთხვევაში ასეც უნდა გაგვეკეთებინა, რაც უკეთესი შედეგის მომტანი იქნებოდა, ვიდრე ეტიკეტის და პროტოკოლის ტრენინგია. ამიტომ მოვუწოდებ ზოგადად მერიის თანამშრომლებს, ვიყოთ უფრო მეტად ყურადრებით, როცა ვგეგმავთ თანამშრომელთა გადამზადების ტრეინინგებს და აქცენტი გავაკეთოთ მნიშვნელოვან და პრიორიტეტულ საკითხებზე“, - განაცხადა დავით ნარმანიამ.
მისივე თქმით, ადგილობრივი თვითმმართველობის ორგანოს მოქმედი კანონმდებლობით ევალება ტრეინინგების ჩატარება და პერიოდულად თანამშრომლების გადამზადება.
„მუნიციპალური სერვისების განვითარების სააგენტომ“ სატრენინგო მომსახურებაზე ტენდერი გამოაცხადა. ტენდერის სავარაუდო ღირებულება 10 000 ლარია.
ტენდერის შედეგად გამარჯვებულმა პრეტენდენტმა ტრენინგი არაუმეტეს 40 საჯარო მოხელეს უნდა ჩაუტაროს. ტრენინგმოდულს სულ 3 დღე, დღეში 5 საათი, დაეთმობა. სასწავლო ჯგუფებს ტრენინგები 2016 წლის ბოლომდე ჩაუტარდება.
სატრენინგო მომსახურების დასახელებაა - დიპლომატიური ურთიერთობები, პროტოკოლისა და ეტიკეტის მოთხოვნები.
სატენდერო დოკუმენტაციის მიხედვით, გარდა დიპლომატიის და პროტოკოლისსაფუძვლების გაცნობის, მერიის და საკრებულოს თანამშრომლები ოფიციალურიმიღებისა და საზეიმო ვახშმის ორგანიზებას, ოფიციალურ მიღებაზე მოქცევის წესებს, ასევე, სხვადასხვა შეხვედრაზე ჩაცმისა და მაგიდასთან მოქცევის წესებს შეისწავლიან.
„დიპლომატიური ვიზიტების, შეხვედრების, მიღებების ატრიბუტები; წერილები, მოკითხვები, ამანათები; დიპლომატიური, პროტოკოლური საქმიანობის თავისებურებები სხვადასხვა ქვეყნებში; დიპლომატიური ეტიკეტი სხვადასხვა ქვეყანაში“, - აღნიშნულია შესასწავლი მოდულების ჩამონათვალში.
როგორც თბილისის საკრებულოს ოპოზიცია „რუსთავი 2-თან“ საუბარში აღნიშნავს, მერია ჩაცმისა და სუფრასთან ქცევის წესების შესწავლაში 7 200 ლარს მარტო მასწავლებელს გადაუხდის. ამას დაემატება ქალაქგარეთ გაკვეთილების ჩასატარებლად 40-ზე მეტი ადამიანის ტრანსპორტირების, კვების, სასტუმროში ცხოვრებისა და საკონფერენციო დარბაზის დაქირავების ხარჯიც. საკრებულოს ოპოზიცია ამბობს, რომ თბილისელების ფული ამგვარ აქტივობებზე არ უნდა დაიხარჯოს და მერიამ ბიუჯეტი უფრო გონივრულად უნდა ხარჯოს.
