საქართველოს 11 საჯარო სკოლაში სასწავლო პროცესის შეწყვეტის მიზეზი დიდთოვლობა და ვირუსია.
საქართველოს განათლებისა და მეცნიერების სამინისტროს ინფორმაციით, დიდთოვლობის გამო სასწავლო პროცესი არ მიმდინარეობს ამბროლაურში, სოფელ პატარა ონის სკოლაში, ნინოწმინდის ორ - კათნატუსა და ჟდანოვაკანის საჯარო სკოლებში, ასევე ხელვაჩურის სოფლებში - გორაში, მახოსა, ზედა ახალშენში.
ვირუსის გამო კი სასწავლო პროცესი საქართველოს მასშტაბით ხუთ სკოლაშია შეწყვეტილი - თბილისის 74-ე საჯარო სკოლა, თელავის მე-5 საჯარო სკოლა და თიანეთის სამი სკოლა - სსიპ სოფელ ახალსოფლის საჯარო სკოლა, ღულელების საჯარო სკოლა, სსიპ ტუშურების საჯარო სკოლა.ჯანდაცვის სამინისტროს რეკომენდაციით, სკოლებში სწავლის შეწყვეტის თაობაზე გადაწყვეტილება ინდივიდუალურად, თითოეული სკოლის საჭიროებიდან გამომდინარე მიიღება. იმ სკოლებში, სადაც გაცდენის რაოდენობამ 20%-ს გადააჭარბა, სწავლა სამი დღით შეწყდება.
