საქართველოს კულტურული მემკვიდრეობის დაცვის ეროვნული სააგენტოს დირექტორის ბრძანების საფუძველზე, გორის მუნიციპალიტეტის, სოფელ მეჯვრისხევის სკოლას კულტურული მემკვიდრეობის ძეგლის სტატუსი მიენიჭა.
ისტორიული შენობის დემონტაჟი მოსახლეობის ჩარევის შედეგად შეჩერდა. სსიპ გორის მუნიციპალიტეტის, სოფელ პატარა მეჯვრისხევის საჯარო სკოლამ შენობა აუქციონზე გაიტანა და 100 ლარად გაყიდა. შენობის ფართობია 314,80 კვ.მ.
ისტორიული შენობა ადგილობრივ აზნაურებს, ჩიკოიძეებს ეკუთვნოდათ, რომლებიც საბჭოთა რეპრესიებს შეეწირნენ. 1935 წლამდე ამ სახლში რეპრესიებს გადარჩენილი გაიანე ჩიკოიძე უსასყიდლოდ ასწავლიდა სოფლის ბავშვებს, 1935 წლიდან კი სახლი არასრულ საშუალო სკოლად გადაკეთდა.
