პარლამენტმა დღვანდელ სხდომაზე მესამე მოსმენით განიხილა და მხარი დაუჭირა „საერთო სასამართლოების შესახებ“ საქართველოს ორგანულ კანონში შესატან ცვლილებათა პაკეტს. ცვლილება რვა კანონში განხორციელდა.

წარმოდგენილი პაკეტით, უზენაესი სასამართლოს მოსამართლეთა რაოდენობა 28 წევრით განისაზღვრება. უქმდება უზენაესი სასამართლოს თავმჯდომარის მოადგილის, ასევე სააპელაციო სასამართლოს თავმჯდომარის მოადგილეების ინსტიტუტი.

ახლებურად ყალიბდება სააპელაციო და რაიონული (საქალაქო) სასამართლოების თავმჯდომარეთა თანამდებობაზე გამწესების საკითხი, კერძოდ, იუსტიციის უმაღლესი საბჭოს მიერ დანიშვნის ნაცვლად მათ შესაბამისი სასამართლოების მოსამართლეები აირჩევენ. განისაზღვრება ცალკეული პროცედურული საკითხებიც.

ერთ-ერთი სიახლე სასამართლოებში საქმეების ელექტრონული განაწილების წესის შემოღებაა. იცვლება მოსამართლეთა შერჩევის კრიტერიუმები.  ცვლილებათა პაკეტი დამოუკიდებელი ინსპექტორის სამსახურის შემოღებასაც ითვალისწინებს. 

 „ჩვენ სამი მოსმენით მივიღეთ მართლმსაჯულების რეფორმის მესამე ტალღის ცვლილებათა პაკეტი, რომელიც უზრუნველყოფს საქართველოში მართლმსაჯულების სისტემის დამოუკიდებლობის შემდგომ განმტკიცებას“, - განაცხადა პარლამენტის თავმჯდომარემ, ირაკლი კობახიძემ.

”საერთო სასამართლოების შესახებ” კანონში შესატანი ცვლილებების პაკეტი მთავრობამ საკანონმდებლო ორგანოს 2015 წლის ივლისში წარუდგინა. ახალი მოწვევის პარლამენტმა ცვლილებებს 87 ხმით, ერთხმად დაუჭირა მხარი.