აშშ-დან 35 რუსი დიპლომატის გაძევებას რუსეთი პასუხს გასცემს - შესაბამისი განცხადება ვლადიმერ პუტინის სპიკერმა გააკეთა, რომლის თქმითაც, რუსეთს პასუხი აშშ-ს „მნიშვნელოვან დისკომფორტს შეუქმნის".
დიპლომატები აშშ-დან საპრეზიდენტო არჩევნების დროს სავარაუდო კიბერშეტევის პასუხად გააძევეს. მათ ქვეყნის დასატოვებლად 72 საათი მისცეს.
BBC-ის ინფორმაციით, პუტინის სპიკერმა მინიშნება გააკეთა, რომ რუსეთი დონალდ ტრამპის მიერ პრეზიდენტის თანამდებობის ოფიციალურად დაკავებას დაელოდება.
რუსეთმა აშშ-ის არჩევნებში კიბერშეტევის გზით ჩარევის შესახებ ბრალდებებს უსაფუძვლო უწოდა.
პრეზიდენტმა ბარაკ ობამამ განაცხადა, რომ „დემოკრატებისა" და პირადად ჰილარი კლინტონის კამპანიის წინააღმდეგ მიმართული სავარაუდო კიბერშეტევისთვის რუსეთის წინააღმდეგ ზომებს მიიღებდა.
იმეილები, რომლებიც კლინტონის კამპანიის მენეჯერისგან, ასევე დემოკრატების ეროვნული კომიტეტის სერვერებიდან მოიპარეს, Wikileaks-ზე საარჩევნო კამპანიის პერიოდში გამოქვეყნდა.
