ზოგიერთი სახელმწიფო კანონი ეწინააღმდეგება ზნეობრივ ნორმებს და მცდელობები აქვთ, ცოდვა ოფიციალურად ნებადართული გახადონ - ამის შესახებ კათოლიკოს-პატრიარქ ილია II-ის 2017 წლის საშბაო ეპისტოლეშია ნათქვამი, რომელიც სამების ტაძარში ცოტა ხნის წინ წაიკითხეს.
ეპისტოლეს თანახმად, როგორც საღვთო, ისე სახელმწიფო კანონები ზრუნავს ადამიანზე, მაგრამ მათში განსხვავებულობას წარმოშობს პიროვნების აღქმა და მასთან დაკავშირებული ხედვის პერსპექტივები.
„ეს განსაკუთრებით ითქმის ისეთ ქვეყნებზე, სადაც ზოგიერთი სახელმწიფო კანონი ეწინააღმდეგება ზნეობრივ ნორმებს და მცდელობები აქვთ, ცოდვა ოფიციალურად ნებადართული გახადონ. პარალელურად ხდება ისიც, რომ ტელევიზია, მასმედია, სოციალური ქსელები… ამა თუ იმ უწესობას ხშირად მიმზიდველად და საინტერესოდ გვისახავენ და ხელს უწყობენ მათ პროპაგანდას" - ნათქვამია ეპისტოლეში.
ეპისტოლეს თანახმად, გულდასაწყვეტია, რომ მსოფლიოს მნიშვნელოვანი ნაწილი „დღესაც ურწმუნოების ცოდვაშია".
„რა თქმა უნდა, მე ვიცი, როგორ უჭირს ჩვენს ხალხს, რამდენი განსაცდელითა და ტკივილითაა სავსე ეს წუთისოფელი, მაგრამ მწამს ისიც, რომ მიუხედავად მრავალი სიმძიმისა და დაბრკოლებისა, ჩვენი ერი ღირსეულად გაივლის გოლგოთის გზას და უფალთან ერთად აღდგება და გაიხარებს" - ნათქვამია ეპისტოლეში.