ენერგეტიკის მინისტრი კახი კალაძე ამბობს, რომ "გაზპრომთან" ხელშეკრულების მოქმედების ვადა დასრულებულია. თუმცა რამდენიმერაუნდიანი მოლაპარაკებების შედეგად "შევძელით გაზპრომ ექსპორტისგან ოპტიმალური წინადადების მიღება".
”გაზპრომი” სომხეთში გატარებული გაზის ტრანზიტის სანაცვლოდ საქართველოს ფულად ანაზღაურებას სთავაზობდა. აქამდე კომპანია გატარებული გაზის 10%-ს ნედლეულის სახით იხდიდა. კალაძის თქმით, მთავრობამ იმსჯელა ამ შემოთავაზებაზე და ხელშეკრულების გაფორმების გადაწყვეტილება მიიღო.
„განვიხილეთ გაზპრომის საბოლოო წინადადება. ხელშეკრულების მოქმედების ვადა დასრულებულია, მოგეხსენებათ 2016 წელს იყო გაფორმებული და 31 დეკემბერს გაუვიდა ვადა, თუმცა რამდენიმე რაუნდიანი მოლაპარაკებების შედეგად შევძელით „გაზპრომ ექსპორტისგან“, ოპტიმალური წინადადების მიღება. მთავრობამ იმსჯელა ამ შემოთავაზებაზე და ხელშეკრულების გაფორმების გადაწყვეტილება მიიღო. ამით საქართველოს დამოკიდებულება რუსეთის ენერგომატარებლებზე არ იზრდება. იცვლება მხოლოდ გადახდის ფორმა, რაც ნედლეულით ანაზღაურების ნაცვლად, საერთაშორისო პრაქტიკის მსგავსად, ფულად ანაზღაურებაზე გადასვლას გულისხმობს. რაც შეეხება საქართველოსთვის გადასახდელ ტრანზიტის საფასურს, ეს იქნება ერთ-ერთი ყველაზე მაღალი ევროპის ქვეყნებს შორის. ჩვენ ასევე შეგვიძლია, საჭიროების შემთხვევაში, სეზონური დეფიციტის დასკამაყოფილებლად შემცირებულ ფასად მივიღოთ ბუნებრივი აირის დამატებით მოცულობა. ხელშეკრულება მოკლევადინაია, 2 წლის ვადით. თუმცა პირველ წელს ნაწილობრივ ისევ რჩება ნედლეულით ანაზღაურების ფორმა, თუმცა, შემდეგ ფულადი ანაზღაურების ფორმით გაგრძელდება. ეს იყო ოპტიმალური გადწყვეტილება არსებული ვითარების გათვალისწინებით. საქართველო პატივს სცემს საერთაშორისო პრინციპებსა და სამართლებრივ ნორმებს რაც მისი, როგორც სატრანზიტო ფუნქციის მქონე ქვეყნისთვის განსაკუთრებით მნიშნელოვანია“,- ამბობს კალაძე.
