„თბილსერვის ჯგუფის“ განცხადებით, „9 აპრილის“ ბაღში მოჭრილი ხეები, რომელთა ფოტოებიც „პარტიზანმა მებაღემ“ ნატა ფერაძემ გუშინ გაავრცელა, ხმელი იყო.
მათი ინფორმაციით, მოიჭრა რამდენიმე ხმელი ხე, რომელიც მოსახლეობას უქმნიდა საფრთხეს.
„თბილსერვის ჯგუფის“ განცხადებას „ლიბერალი“ უცვლელად გთავაზობთ:
„თბილსერვის ჯგუფი" თავის მოვლა-პატრონობაში არსებულ ბაღებსა და პარკებში გეგმურ სხვლა-ფორმირებებს ახორციელებს. დღეს „9 აპრილის" სახელობის ბაღში ხეების სხვლა-ფორმირება და ასევე ხმელი ხეების მოჭრა განხორციელდა. მოიჭრა რამდენიმე ხმელი ხე, რომელიც მოსახლეობას უქმნიდა საფრთხეს. „თბილსერვის ჯგუფმა" მის მოვლა პატრონობაში არსებულ ბაღებსა და პარკებში 2016 წლის განმავლობაში საგაზაფხულო და საშემოდგომო გამწვანებითი სამუშაოების ფარგლებში სხვადასხვა ჯიშის 393 000 ძირი ყვავილი და 12692 მარადმწვანე ხე–მცენარე დარგო“.
