ევროპარლამენტის 2 თებერვლის პლენარულ სხდომის დღის წესრიგში საქართველოს ვიზალიბერალიზაციის საკითხი ოფიციალურად შეიტანეს.
„არაწევრი ქვეყნები, რომლის მოქალაქეებიც საგარეო საზღვრის კვეთისას ვიზას უნდა ფლობდნენ და რომლის მოქალაქეებიც ამ მოთხოვნისგან თავისუფალნი არიან (საქართველო)" - ასე ეწოდება საკითხს, რომელზეც მომხსენებელი ევროპარლამენტარი მარია გაბრიელი იქნება.
12 იანვარს ევროპარლამენტის იურიდიულ საკითხთა, შინაგან საქმეთა და სამოქალაქო თავისუფლებების კომიტეტმა (LIBE) 42 ხმით 2-ის წინააღმდეგ საქართველოს ვიზალიბერალიზაციას მხარი დაუჭირა.
1-მა დეპუტატმა კენჭისყრაში მონაწილეობის მიღებისგან თავი შეიკავა.
ევროკავშირის მუდმივი წარმომადგენლების საბჭომ (COREPER) საქართველოს ვიზლიბერალიზაციას მხარი 20 დეკემბერს დაუჭირა.
მას შემდეგ, რაც ევროკავშირის ინსტიტუტები შეჩერების გამარტივებულ მექანიზმზე შეთანხმდნენ, ტრიალოგის შეხვედრა საქართველოს ვიზალიბერალიზაციის პროცესის სასარგებლოდ დასრულდა.
საქართველოს ვიზალიბერალიზაციას ევროკომისია (ტექნიკური ნაწილი) და ევროკავშირის საბჭო მხარს უჭერს. დარჩენილია ევროპარლამენტის პლენარული კენჭისყრა, რომლითაც საქართველოს უვიზო მიმოსვლის პოლიტიკურ დონეზე მხარდაჭერის ნაწილი დასრულდება.