„ეროვნულ-დემოკრატიული ინსტიტუტის“ (NDI) კვლევის თანახმად, გამოკითხულთაგან NATO-ს წევრობას 61% უჭერს მხარს, ხოლო 25% წინააღმდეგია. 

ასევე, ენმ-ის  მხარდამჭერთა 19%-ით მეტი უჭერს მხარს NATO-ში გაწევრებას „ქართული ოცნების“ მხარდამჭერებთან შედარებით.

„ქართული ოცნების“ მხარდამჭერთა 60%-ისთვის მისაღებია საქართველოს მთავრობის გაცხადებული მიზანი, რომ საქართველო გახდეს NATO-ს წევრი, ხოლო ენმ-ის მხარდამჭერთა - 79%.

გამოკითხულთა 72%-ისთვის მისაღებია საქართველოს მთავრობის გაცხადებული მიზანი, საქართველო ევროკავშირის წევრი გახდეს, 18%-სთვის კი - მიუღებელია.

კვლევის საველე სამუშაოები მოიცავს 4 ნოემბრიდან 4 დეკემბრამდე პერიოდს. კვლევა საქართველოს მასშტაბით 3,141 პირისპირ ინტერვიუს წარმომადგენობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან მოსახლეობას შორის ჩატარდა (ოკუპირებული ტერიტორიების გამოკლებით). კვლევაში საშუალო ცდომილების ზღვარი არის +/- 1,8%.

 NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC–საქართველო.