ვენეციის კომისიის პრეზიდენტი ჯანი ბუკიკიო მიიჩნევს, რომ მთლიანობაში საქართველოს კონსტიტუცია საერთაშორისო სტანდარტებს შეესაბამება, მაგრამ ის უნდა გაუმჯობესდეს. მისთვის მისასალმებელია ის ფაქტი, რომ პარლამენტის თავმჯდომარე ზად არის, კონსტიტუციაში ცვლილებებების შეტანისას ვენეციის კომისიის შენიშვნები და მოსაზრებები გაითვალისწინოს.
„მე ვარ საქართველოს მეგობარი, ბოლო 20 წლის განმავლობაში ბევრჯერ ვარ საქართველოში ნამყოფი. როგორც იტალიელს, მესმის ქართული მენტალიტეტი, ჩვენი თვისებები, ჩვენი პრობლემები, ჩვენ კარგად გვესმის ერთმანეთის. ვენეციის კომისიას 2010 წელს შეტანილი ცვლილებების დროს ჰქონდა კრიტიკული შენიშვნა ზოგიერთ საკითხზე, რომელთა სრულყოფაც უნდა მოხდეს. ჩვენ არაფერს გახვევთ თავზე, ჩვენ გვსურს გაუმჯობესდეს საქართველოს კონსტიტუცია და მოვიდეს სრულ შესაბამისობაში საერთაშორისო სტანდარტებთან“, - განაცხადა ჯანი ბუკიკიომ ბრიფინგზე.
