ფრაქცია „ქართული ოცნება - დემოკრატიული საქართველოს“ თავმჯდომარის, მამუკა მდინარაძის განცხადებით, მმართველი გუნდი საკონსტიტუციო სასამართლოს მოსამართლის ვაკანტურ თანამდებობაზე 4 კანდიდატურას განიხილავს, რომელთაგან სამი საპარლამენტო უმრავლესობის წევრია. მდინარაძის ინფორმაციით, ერთ-ერთი კანდიდატი მანანა კობახიძეა. საპარლამენტო უმრავლესობა აღნიშნულ თანამდებობაზე კანდიდატურას 23 იანვარს წარადგენს. ამის შესახებ მდინარაძემ „ინტერპრესნიუსს“ განუცხადა.
საკონსტიტუციო სასამართლოს ახალი წევრის გამწესება სასამართლოს წევრის უფლებამოსილების ვადის ამოწურვამდე არაუადრეს ერთი თვისა და არაუგვიანეს ათი დღის ვადაში უნდა მოხდეს. თუმცა საკონსტიტუციო სასამართლოში მოსამართლის ერთი თანამდებობა, რომელზეც კანდიდატურა პარლამენტმა უნდა წარადგინოს, სექტემბრიდან ვაკანტურია. პარლამენტის კვოტით საკონსტიტუციო სასამართლოს წევრის კანდიდატურის წარდგენის უფლება აქვთ პარლამენტის თავმჯდომარეს, საპარლამენტო ფრაქციას, პარლამენტის წევრთა ექვსკაციან ჯგუფს.
