შინაგან საქმეთა სამინისტროს ინფორმაციით, 24 იანვარს რუსთაველის გამზირზე მომხდარ ავტოავარიაში მონაწილე სამივე მძღოლი ამ ეტაპზე მხოლოდ მოწმის სახით დაიკითხა. რაც შეეხება რომელიმე მათგანის ბრალეულობას, უწყებაში განმარტავენ, რომ ამას ექსპერტიზა დაადგენს.
„გამოძიების ფარგლებში, დაინიშნა ტრასოლოგიური, ავტოტექნიკური და სასამართლო-სამედიცინო ექსპერტიზები, რომელთა დასკვნების საფუძველზე, საგამოძიებო ორგანოს ექნება მტკიცებულებათა ერთობლიობა, რათა ავტოსაგზაო შემთხვევაში დამნაშავე პირის მიმართ განხორციელდეს კანონის შესაბამისი ღონისძიებები.
საზოგადოების ინფორმირებისთვის კიდევ ერთხელ განვმარტავთ, რომ, კანონის თანახმად, ავტოსაგზაო შემთხვევაში ბრალეული პირის გამოკვეთა და მისთვის ბრალის წარდგენა მხოლოდ შესაბამისი ექსპერტიზების დასრულების შემდეგაა შესაძლებელი.
შს სამინისტრო მიმართავს მაქსიმალურ ძალისხმევას, რომ აღნიშნული საქმე დროულად იქნას გამოძიებული და დამნაშავე წარდგეს მართლმსაჯულების წინაშე“, - ნათქვამია შინაგან საქმეთა სამინისტროს განცხადებაში.
მომხდარზე გამოძიება სსკ-ს 276-ე მუხლის მე-5 ნაწილით დაიწყო, რაც ნიშნავს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა. აღნიშნული დანაშაული ისჯება თავისუფლების აღკვეთით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.
24 იანვარს, გვიან ღამით რუსთაველის გამზირზე ავტოავარია მოხდა, რომლის შედეგადაც ერთი ადამიანი გარდაიცვალა, რამდენიმე კი დაშავდა.