სახალხო დამცველმა 2016 წლის საქმიანობის შემაჯამებელი დოკუმენტი წარმოადგინა. მასში საუბარია აპარატში მოქალაქეების განცხადებებზე, სახალხო დამცველის რეკომენდაციებსა და მათი შესრულების მაჩვენებელზე. ანგარიშში მოხვდა მონაცემები ომბუდსმენის აპარატის ფინანსური და ადამიანური რესურსის შესახებ.
ანგარიშის თანახმად, წინა წელთან შედარებით, 2016 წელს აპარატისადმი მიმართვიანობა გაიზარდა - ადამიანის უფლებების სავარაუდო დარღვევის ფაქტების შესახებ მოქალაქეებმა სახალხო დამცველს 8827-ჯერ მიმართეს, საიდანაც დასაშვებობა 6558-მა განცხადებამ გაიარა. მათი დიდი ნაწილი, 3214 განცხადება სისხლის სამართალს ეხებოდა. ამასთან, შესული განცხადებებიდან 382 ბავშვის უფლებათა დაცვის ცენტრში გადაიგზავნა, 186 - შშმ პირთა უფლებების დაცვის დეპარტამენტში, ხოლო 155 - გენდერული თანასწორობის დეპარტამენტში.
2016 წელს სახალხო დამცველის აპარატმა მოამზადა და სხვადასხვა უწყებაში გაგზავნა 15 623 კორესპონდენცია. რაც შეეხება რეკომენდაციებს, სახელმწიფო უწყებებისა და კერძო პირების მიმართ 77 რეკომენდაცია გაიცა, საიდანაც 15 დისკრიმინაციას ეხებოდა. დანარჩენი რეკომენდაციები ისეთ საკითხებს ეხებოდა, როგორიცაა თანასწორობს უფლება, ქალთა უფლებები, არასათანადო მოპყრობა, შრომითი უფლებები, შშმ პირთა უფლება, პატიმართა უფლებები და ა.შ.
ამ რეკომენდაციების უმეტესობა, 18 მათგანი საქართველოს მთავარ პროკურატურას გაეგზავნა (საიდანაც 13 შესრულდა), 7 - მთავრობას (შესრულდა 2), 7 - შსს-ს(შესრულდა 5), 5 - განათლების სამინსიტროს (შესრულდა 1), 4 - სასჯელაღსრულების სამინისტროს (შესრულდა 1) და სხვა.
საანაგრიშო პერიოდში ცხელ ხაზზე 2 559 ზარი შევიდა, მობილური ჯგუფების ადგილზე გასვლის შედეგად შედგა 337 ოქმი, საიდანაც 167 შეტყობინება თავისუფლების აღკვეთის დაწესებულებაში სავარაუდო უფლებების დარღვევას ეხებოდა: #8 დაწესებულება - 43 შეტყობინება, #2 დაწესებულება - 38 შეტყობინება, #3 დაწესებულება - 21 წინადადება, #5 დაწესებულება - 17 წინადადება, #6 დაწესებულება - 14 წინადადება, #18 დაწესებულება - 9 წინადადება და ა.შ.