ქვეყანაში მარჯვენასაჭიანი ავტომობილების შემოყვანა აღარ აიკრძალება. აღნიშნული საკითხი შინაგან საქმეთა მინისტრის მოადგილემ პარლამენტში უმრავლესობის ლიდერსა და იურიდიული კომიტეტის თავმჯდომარესთან განიხილა. საგზაო მოძრაობის უსაფრთხოების შესახებ კანონპროექტთა პაკეტიდან ეს მუხლი უკვე ამოღებულია, თუმცა უცვლელი რჩება ე.წ. უკონტაქტო პატრულირება და მართვის მოწმობის 100-ქულიანი სისტემა.
„პარლამენტმა დეკემბერში მიიღო საგადასახადო კოდექსში ცვლილებები, რამაც გარკვეულწილად გააძვირა განბაჟება და ის რისკი, რომ გაიზრდებოდა მარჯვენასაჭიანი ავტომობილების რაოდენობა მარცხენასაჭიანებთან მიმართებაში და გაუთანაბრდებოდა მათ, შემცირდა. შესაბამისად, მკაცრ მიდგომას აღარ მოვითხოვთ და ეს ნაწილი ამოღებული იქნება კანონპროექტიდან. ანუ არ აიკრძალება მარჯვენასაჭიანები. ვისაც უღირს, რომ ამ ფასად შემოიყვანოს, შესაძლებელი იქნება,“ - განაცხადა შს მინისტრის მოადგილემ შალვა ხუციშვილმა „რუსთავი 2-ის“ ეთერში.
იურიდიული კომიტეტის თავმჯდომარის, ეკა ბესელიას განმარტებით, მარჯვენასაჭიანი ავტომანქანების აკრძალვის აუცილებლობა დღის წესრიგში აღარ დგას, თუმცა ქულათა სისტემა, მართვის მოწმობის შეჩერების საკითხი, უკონტაქტო პატრულირების თემა და ა.შ. ღია საკომიტეტო ფორმატში განიხილება.
შინაგან საქმეთა სამინისტროს მიერ ერთი წლის წინ ინიცირებული კანონპროექტის განხილვა პარლამენტში ორშაბათიდან განახლდება.