საქართველოს ახალგაზრდა იურისტთა ასოციაცია დეკანოზ გიორგი მამალაძის საქმესთან დაკავშირებით განცხადებას ავრცელებს და პოლიტიკოსებს ბრალდებულის უდანაშაულობის პრეზუმფციის დაცვისკენ მოუწოდებს. იურისტების განმარტებით, პოლიტიკური თანამდებობის პირები კვლავაც აგრძელებენ საჯარო განცხადებების გაკეთებას, რომელთა შინაარსიც ისე წარმოაჩენს სიტუაციას, თითქოს დანაშაული დადასტურებულია.
„კიდევ ერთხელ მოვუწოდებთ პოლიტიკოსებს, დაიცვან და პატივი სცენ საქართველოს კონსტიტუციით და კანონმდებლობით გარანტირებული უფლებები და თავი შეიკავონ ისეთი განცხადებებისა და გამონათქვამებისაგან, რაც სასამართლოს მიერ განაჩენის გამოტანამდე წარმოაჩენს ბრალდებულ პირს დამნაშავედ, ხოლო გამოძიების ვერსიას - დამტკიცებულ ფაქტად”, - ნათქვამია განცხადებაში.
ამასთან, საია მოითხოვს, პროკურატურამ დაცვის მხარეს დაწესებული შეზღუდვები მოუხსნას, რათა მამალაძემ და მისმა ადვოკატმა საჯაროდ გაჟღერებულ ბრალდებებზე პასუხის გაცემა შეძლონ.
”მოცემულ საქმეზე ნათელი ხდება, რომ პროკურატურის მიერ მიღებული ზომები, ბრალდებულს აშკარად არათანაბარ მდგომარეობაში აყენებს. ერთი მხრივ, პროკურატურა ღიად საუბრობს საქმისათვის მნიშვნელოვან სხვადასხვა გარემოებაზე, ხოლო მამალაძე და მისი ადვოკატები ვერ პასუხობენ საჯაროდ გაჟღერებულ ბრალდებებს“,- აღნიშნულია განცხადებაში.
საია პროკურატურას და შსს-ს გიორგი მამალაძის ოჯახის წევრების უსაფრთხოების დაცვისკენაც მოუწოდებს.