კომპანია „ბიბლუსი“ საქმიანი რეპუტაციის შელახვისთვის სასამართლოში ჩივის და 9 თებერვალს გავრცელებული ვიდეომიმართვის ავტორებისგან გავრცელებული მცდარი ფაქტების უარყოფას ითხოვს. ამის შესახებ ინფორმაციას სააგენტო „ინტერპრესნიუსი“ ავრცელბს.
როგორც ”ბიბლუსის” იურისტმა, ანა სამსონიამ სააგენტოს განუცხადა, კომპანია ”ბიბლუსს” სურს, რომ დაიცვას თავისი დარღვეული უფლება და დაამტკიცოს, რომ აღნიშნული მიმართვა ცილისწამება იყო.
„2017 წლის 9 თებერვალს, მასობრივი ინფორმაციის საშუალებებით გავრცელდა 2 ყოფილი და 4 მოქმედი თანამშრომლის ვიდეო და წერილობითი მიმართვა კომპანია ”ბიბლუსის” მიმართ. აღნიშნულ მიმართვაში გავრცელებული იყო სხვადასხვა ცნობები, რამაც კომპანიის საქმიანი რეპუტაციის შელახვა გამოიწვია. სწორედ ამიტომ, კომპანია ”ბიბლუსი” მიმართავს სასამართლოს, რათა დაიცვას თავისი დარღვეული უფლება და დაამტკიცოს, რომ აღნიშნული მიმართვა შეიცავდა არსებითად მცდარ ფაქტებს და იყო ცილისწამება. კომპანიის მოთხოვნაა, მოხდეს გავრცელებული მცდარი ფაქტების უარყოფა და სწორი ფაქტების გავრცელება ზუსტად იმავე საშუალებებში, სადაც მათი მიმართვა გამოქვეყნდა. თავდაპირველად ეს გავრცელდა “აუდიტორია 115“-ის ”ფეისბუქ” გვერდის საშუალებით. ამასთან დაკავშირებით, კომპანიის მიერ მომზადებული სარჩელი გადაეცა სასამართლოს”, - განაცხადა ანა სამსონიამ.