„მედიასაშუალებებში ცოტა ხნის წინ გავრცელებული ინფორმაცია საქართველოს მთავარი პროკურორის მიერ თანამდებობის დატოვებასთან დაკავშირებით არის სიცრუე და არ შეესაბამება სინამდვილეს, - ამის შესახებ განცხადებას მთავარი პროკურატურა ავრცელებს.
„მიგვაჩნია, რომ მსგავსი სახის ინფორმაციის გავრცელება ხდება მიზანმიმართულად და ემსახურება საზოგადოების შეცდომაში შეყვანას. საქართველოს მთავარი პროკურორი ირაკლი შოთაძე მუშაობას ჩვეულ რეჟიმში აგრძელებს", - აცხადებს პროკურატურა.
შოთაძის გადადგომის შესახებ ინფორმაცია სააგენტო „ჯი-ეიჩ-ენმა“ სანდო წყაროზე დაყრდნობით გაავრცელა. სააგენტო წერს, რომ „როგორც ირკვევა შოთაძის გადადგომის მიზეზი, ე.წ. ციანიდის საქმეა".
„ჯი-ეიჩ-ენის“ წყაროს ინფორმაციით ირაკლი შოთაძე თანამდებობიდან დღეს გადადგა. ამ ინფორმაციას უწყების პრესსამსახურში არ ადასტურებენ, თუმცა „ჯი-ეიჩ-ენის“ ინფორმაციით, ოფიციალური განცხადება ორშაბათს გაკეთდება", - წერს „ჯი-ეიჩ-ენი".