ადამიანის უფლებათა დაცვის კომიტეტის სხდომაზე სახალხო დამცველის მიერ პარლამენტში წარდგენილი ანგარიშის მიღებული რეკომენდაციების შესრულების თაობაზე რამდენიმე სახელმწიფო ორგანოს წარმომადგენელს მოუსმინეს, მათ შორის, იუსტიციის უმაღლესი საბჭოსა და უზენაესი სასამართლოს ანგარიშს, რომელიც ნინო გვენეტაძემ წარადგინა. სხდომა კამათის ფონზე მიმდინარეობს.
საკომიტეტო მოსმენაზე უზენაესი სასამართლოს თავმჯდომარეს, ნინო გვენეტაძეს ოპოზიციამ შეკითხვები ტელეკომპანია „რუსთავი2-ისა“ და ე.წ. ციანიდის საქმესთან დაკავშირებით დაუსვა. „ნაციონალური მოძრაობის“ წევრმა, ნიკა მელიამ გვენეტაძეს სთხოვა, გამოეხატა პოზიცია თავის მოადგილე, უზენაესი სასამართლოს მოსამართლე მიხეილ ჩინჩალაძესთან დაკავშირებით. როგორც მელიამ აღნიშნა, ჩინჩალაძე უზენაეს სასამართლოში პროკურატურას წარმოადგენს. რასაც სხდომათა დარბაზში ხმაური მოჰყვა.
ნინო გვენეტაძის ანგარიშზე სახალხო დამცველსაც ჰქონდა შენიშვნები. მისი თქმით, სახალხო დამცველის რეკომენდაციები იუსტიციის უმაღლესმა საბჭომ და უზენაესმა სასამართლომ ნაწილობრივ შეასრულა.
