დღეს მთავრობის სხდომაზე მიიღეს გადაწყვეტილება, რომ ოკუპირებულ ტერიტორიებთან გამყოფი ხაზების სიახლოვეს მცხოვრები მოსახლეობა ორასლარინი ბუნებრივი აირის ვაუჩერით უზრუნველყონ. ამის შესახებ ჟურნალისტებს შერიგებისა და სამოქალაქო ინტეგრაციის საკითხთა მინისტრმა, ქეთევან ციხელაშვილმა განუცხადა.
„თქვენ იცით, რომ ეს გადაწყვეტილება გამომდინარეობს უწყებათაშორისი დროებითი კომისიის წინა წლის ნოემბრის დადგენილებიდან. ჩვენ წლების განმავლობაში გამყოფი ხაზების სიახლოვეს მცხოვრებ, ფაქტობრივად ყველა ოჯახს ვეხმარებით გამოსაზამთრებელი ღონისძიებებით, მათ შორის, ორასლარიანი ვაუჩერით. ამჯერად აღრიცხული ოჯახების რაოდენობა შეადგენს 11 894-ს. წინა წლის ბოლოს ფაქტობრივად ყველა სოფლის გაზიფიცირება დასრულდა. არის გამონაკლისი 728 ოჯახი, რომლებსაც ბუნებრივი აირის საფასურის ნაცვლად ხელზე ორასლარიანი ვაუჩერი მიეცემათ. პროექტის ღირებულება 2 378 800 ლარს შეადგენს - თქვა მინისტრმა.