დეკანოზ გიორგი მამალაძის ადვოკატმა, მიხეილ რამიშვილმა ჟურნალისტებთან განაცხადა, რომ დეკანოზის საქმეში დარღვეულია უდანაშაულობის პრეზუმფცია და თანასწორობის პრინციპი. ასევე, აღნიშნავს, რომ საქმის მასალებს, პროკურატურის ხელთ არსებულ ჩანაწერებს ჯერ არ იცნობს.
„პროკურატურას არაერთხელ უთქვამს, რომ პატრიარქის ჩამობრძანების შემდეგ გააცნობს საპატრიარქოს გარკვეულ დოკუმენტაციას, საქმის მასალების. აქედან გამომდინარე, მოხარულნი ვიქნებით, თუ ჩვენი მოსმენაც მოხდება, რადგან თანასწორობის პრინციპი არ უნდა დაირღვეს. შესაბამისად, მამა გიორგი ელოდებოდა და მოხარულია, რომ ჩამობრძანდა საქართველოს პატრიარქი საქართველოში“ - განუცხადა მიხეილ რამიშვილმა ჟურნალისტებს.
„დარღვეულია უდანაშაულობის პრეზუმფცია, თანასწორობის პრინციპი. ძალიან ბევრი რამ არის დარღვეული...ალბათ, მაგათთვისაც ნათელი გახდა, რომ თანასწორობის პრინციპი არ უნდა დაირღვეს და იმიტომ მოითხოვა პრეზიდენტმა, რომ პროკურატურამ მოუხსნას ჩემს კოლეგებს ის ვალდებულება, რაც გაუთქმელობიდან გამომდინარეობს,“ - განაცხადა მიხეილ რამიშვილმა.
