„ხალხს უნდა მივცეთ პასუხი, ხალხი ღელავს“, - ამის შესახებ კათოლიკოს-პატრიარქმა, ილია მეორემ საპატრიარქოში პრეზიდენტსა და სინოდის წევრებთან გამართულ შეხვედრაზე განაცხადა.
მისი შეფასებით, საქართველოს ეკლესიის ისტორიას ასეთი რამ არ ახსოვს და ეს არა მარტო ეკლესიის, არამედ ერის პრობლემაა. ამიტომ პატრიარქი მიიჩნევს, რომ მიმდინარე მოვლენების დარეგულირების პროცესში ხელისუფლებაც უნდა ჩაერთოს.
„ვფიქრობ, თქვენ გრძნობთ ამის მნიშვნელობას. უკვე მოდის გამოძახილი უცხოეთიდან, კითხულობენ, რა ხდება საქართველოში, ხოლო ჩვენ არა გვაქვს გარკვეული პოზიცია, გარკვეული გამოძიება. ამიტომ ჩვენ უნდა დავეხმაროთ, ერთობლივი გამოძიება უნდა შედგეს სახელმწიფოსა და ეკლესიისა. ხალხს უნდა მივცეთ პასუხი, ხალხი ღელავს. ვფიქრობ, ყველაფერი დამშვიდდება და კარგად იქნება, მაგრამ ყოველ მოვლენას თავისი სახელი უნდა დაერქვას, რათა ხალხი დაკმაყოფილდეს და დამშვიდდეს“, - განაცხადა პატრიარქმა.
