ე.წ. ციანიდის საქმეში ბრალდებულის, დეკანოზ გიორგი მამალაძის ადვოკატის, მიხეილ რამიშვილის განცხადებით, მისი დაცვის ქვეშ მყოფი შესაძლებელია დღეს საპატრიარქოში პატრიარქთან შესახვედრად გადაიყვანონ.
„შესაძლებელია საპატრიარქოში გადაყვანა მოხდეს. წინასწარ ვერაფერს გეტყვით, ავდივარ [საავადმყოფოში] და გავარკვევ ყველაფერს", - განაცხადა რამიშვილმა.
მისი თქმით, გიორგი მამალაძე არღვევს დუმილის უფლებას და მზად არის ჩვენება მისცეს. მისი თქმით, დეკანოზი წაყენებულ ბრალდებაში თავს უდანაშაულოდ ცნობს.
„მამა გიორგი არღვევს დუმილის უფლებას და ის მზად არის ჩვენება მისცეს. ჩვენ შესაბამისად მივმართავთ საგამოძიებო ორგანოებს და უკვე სრულყოფილად დაიწყება მამა გიორგის დაკითხვა. წაყენებული ბრალდება რაც აქვს მამა გიორგის, იგი უდანაშაულოდ თავს ცნობს და თუ მივა პროკურატურა იმ დასკვნამდე, რომ აქ აღარ არსებობს დანაშაული და კანონის შესაბამისობაში მოიყვანს ფაქტობრივ გარემოებებიდან გამომდინარე საქმის მსვლელობას, უნდობლობა ვეღარ იქნება, იმიტომ, რომ თუ შესაწყვეტია, უნდა შეწყდეს ეს საქმე,“ - აცხადებს მიხეილ რამიშვილი.