თამარ ხიდაშელი ომბუდსმენის აპარატში ევროკავშირის პროექტის ფარგლებში სამართლებრივი ექსპერტის პოზიციაზე დაინიშნა. „ბრძოლა დისკრიმინაციის ყველა ფორმის წინააღმდეგ საქართველოში" - ასე ეწოდება პროექტს, რომლის ფარგლებში სამართლებრივი ექსპერტის პოზიციაზე გამოცხადებულ კონკურსშიც ხიდაშელი იღებდა მონაწილეობას.
ხიდაშელი გასაუბრებაზე ომბუდსმენის აპარატში 15 თებერვალს იმყოფებოდა, თუმცა ვინაიდან პროექტი მასში დასაქმებულს პოლიტიკურ საქმიანობაში მონაწილეობას უკრძალავს, პარტიის წევრის სტატუსის 2 წლის ვადით შეჩერების მოთხოვნით „რესპუბლიკურ პარტიას“, როგორც თვითონ იხსენებს, ჯერ კიდევ 10 თებერვალს, პრევენციულად მიმართა.
„იმის გამო, რომ სახალხო დამცველის აპარატია და ვიღაცას შეიძლებოდა დარჩენოდა განცდა მიკერძოების შესახებ, მე დავწერე განცხადება პარტიის წევრობის შესაჩერებლად” - უთხრა ხიდაშელმა „ლიბერალს“ 15 თებერვალს.
შეკითხვაზე, დაბრუნდება თუ არა პარტიაში 2 წლის შემდეგ, იგი პასუხობს რომ ჯერჯერობით ეს არ იცის.
„ამაზე წინასწარ ვერ გიპასუხებთ", - ამბობს ხიდაშელი.
„ლიბერალი“ დაინტერესდა, თუ რატომ გადაწყვიტა ხიდაშელმა პარტიის წევრის სტატუსის შეჩერება წინასწარ, როცა არ იცოდა, შეარჩევდნენ თუ არა იმ ოთხ კონკურსანტს შორის, რომლებიც ამ პოზიციის დასაკავებლად კონკურსში იღებდნენ მონაწილეობას.
„საქართველოში პოლიტიკური პარტიის წევრობა, განსაკუთრებით მაშინ, როცა არ ხარ მმართველი პარტიის წევრი, არის სტიგმასთან დაკავშირებული და თქვენი ცნობისმოყვარეობაც ამ საკითხთან დაკავშირებით ამაზე მეტყველებს. მე ჩემს გამოცდილებას გაგიზირებთ: ერთ გასაუბრებაზე, რომელზეც იქამდე ვიმყოფებოდი, ნახევარსაათიანი ინტერივიუს მანძილზე ძირითადად იმაზე მეკთიხებოდნენ, პოლიტიკური პარტიის წევრობა ხელს ხომ არ შემიშლიდა საქმიანობის განხორციელებაში. გარდა ამისა, ვიცი რა საზოგადოებაში არსებული განწყობების შესახებ და იმის შესახებ, რომ დასაქმების შემთხვევაში შეიძლებოდა ომბუდსმენის აპარატს შექმნოდა პრობლემა, მე მივიღე გადაწყვეტილება, რომ რადგან კონკურსში ვიღებდი მონაწილეობას, ამიტომ შემეჩერებინა პარტიის წევრობა“ - უთხრა ხიდაშელმა „ლიბერალს“.
ომბუდსმენის აპარატში ამბობენ, რომ ანტიდისკრიმინაციულ საკითხებში სამართლებრივი ექსპერტის პოზიციის დასაკავებლად კონკურსი 2 ეტაპად ჩატარდა, რაც CV-ების შერჩევასა და გასაუბრებას ითვალისწინებდა.
„შესარჩევ კომისიაში იყვნენ სახალხო დამცველის პირველი მოადგილე, ნათია კაციტაძე; სახალხო დამცველის მოადგილე, ეკატერინე სხილაძე და პროექტის ხელმძღვანელი, ლევან მესხორაძე. პროექტში დასაქმებულია 15 ადამიანი (პროექტის გუნდის ხელმძღვანელი, ფინანსური მენეჯერი, ადმინისტრაციული ასისტენტი, PR ექსპერტი, საპარლამენტო მდივანი; 4 სამართლებრივი ექსპერტი და 6 საკონტაქტო პირი რეგიონებში“ - უთხრეს „ლიბერალს“ ომბუდსმენის აპარატში.
მათივე განმარტებით, პროექტის ხანგრძლივობა 31 თვეა და მას ლევან მესხორაძე ხელმძღვანელობს.
პროექტის მიზნებია:
• დისკრიმინაციული სტერეოტიპების წინააღმდეგ ბრძოლა; სახალხო დამცველის აპარატის თანასწორობის დეპარტამენტის გაძლიერება.
• სახალხო დამცველის აპარატის გაძლიერება მოწყვლადი ჯგუფების, მათ შორის, შშმ პირების, პატიმრების, ქალების, კონფლიქტით დაზარალებული ადამიანების უფლებების დაცვის მიზნით.
აპარატის ინფორმაციით, თამარ ხიდაშელი 2013–2015 წლებში ხელმძღვანელობდა ევროკავშირის პროექტს „სახალხო დამცველის აპარატის მხარდაჭერა“.
თამარ ხიდაშელი „რესპუბლიკური პარტიის" წევრის სტატუსს 2 წლით იჩერებს
