ცხოველთა გადარჩენის სახალხო ფრონტის ორგანიზებით, რუსთაველის მეტროსთან დღეს აქცია იმართება, სადაც მოქალაქეები მიუსაფარი ცხოველებისთვის საკვებს აგროვებენ.
„ჩვენი მიზანია შევაგროვოთ ცხოველებისთვის საკვები, რომელსაც გადავცემთ იმ ადამიანებს, რომლებიც ქუჩაში მიუსაფარ ცხოველებს კვებავენ“, - ამბობს „ლიბერალთან“ საუბრისას თიკო კვალიაშვილი, ცხოველთა გადარჩენის სახალხო ფრონტის აქტივისტი. მათი თქმით, ამგავრი აქციები მომავალშიც გაგრძელდება.
„ალბათ ყველას მოგეხსენებათ, რომ საქართველოში კვლავ მწვავედ დგას მიუსაფარ ცხოველთა პრობლემა. პრობლემა კვების, შეფარების, მკურნალობის და ელემენტარულად მათი დაცვის. აქციის მიზანია, ცხოველთა მოყვარულებმა შევაგროვოთ მათთვის საკვები და დასაფენები, რომლებიც დანაწილდება იმ ადამიანებს შორის ქუჩაშიც რომ აქცევენ ყურადღებას ასეთ არსებებს... მოგეხსენებათ ცივი ზამთარია და ამ დროს უფრო უჭირთ თავის გადარჩენა მათ. ამავდროულად აგროვდება თანხა ჩვენი ინვალიდი ძაღლის ბობოს შემფარებლისათვის. ვეხმარებით ზუგდიდელ 87 წლის ლუდა ბებოს, რომელიც უამრავ კატას და ძაღლს კვებავს თავის პენსიით და თავად ხშირად მშიერი იძინებს“, - აცხადებენ ორგანიზატორები facebook-ზე.
