ჭყონდიდის მიტროპოლიტ მეუფე პეტრეს თქმით, დეკანოზ გიორგი მამალაძეს ციანიდი საპატრიარქოს ერთ-ერთმა გავლენიანმა პირმა ნათესავი ოქრომჭედლისთვის სთხოვა. ამის შესახებ მეუფე პეტრემ ტელეკომპანია „იმედს" განუცხადა.
„მამა გიორგის საპატრიარქოს ერთ-ერთი გავლენიანი ადამიანი რამდენიმე ხნით ადრე სთხოვს, რომ მას მისი ნათესავი ოქრომჭედლისთვის, რომელიც ცხოვრობს უკრაინაში, სჭირდება ციანიდი, რომელიც გამოიყენება ოქროს გადამუშავებაში. მიუთითებს მის ახლობელზე, რომელიც საყდრისში მუშაობს, ოქროსთან აქვს შეხება, და აქედან იწყება მამა გიორგის ჩართულობა, როცა ის ეძებს ციანიდს", - განაცხადა მეუფე პეტრემ.
ჟურნალისტის კითხვას, გულისხმობს თუ არა ის ჟურნალისტ ირაკლი მამალაძეს, რომელიც საყრდისის დაცვის კომიტეტის წევრია, მიტროპოლიტმა უპასუხა - დიახ.
„შემდეგ იწყება ჩართულობა, რომ ეს ციანიდი არა საპატრიარქოს გავლენიანი პირის დავალებით და ოქრომჭედლისთვის არის საჭირო, არამედ საპატრიარქოში მკვლელობის მომზადებისთვის. ეს არის ინტრიგა, სცენარი", - განაცხადა მან.
