„არ შეიძლება შიგნიდან ამხელა სკანდალი ატყდეს, რა თქმა უნდა გარედან მართული პროცესებია", - ასე შეაფასა პატრიარქის დაცვის ყოფილმა უფროსმა სოსო ოხანაშვილმა „რუსთავი 2- ის" გადაცემაში „პოსტსკრიპტუმი" საპატრიარქოში მიმდინარე მოვლენები.
კითხვაზე, რაც ახლა ხდება, არის თუ არა პატრიარქის ტახტისთვის ბრძოლა, სოსო ოხანაშვილმა განაცხადა, რომ ამ ეტაპზე ამ პასუხისგან თავს შეიკავებს, თუმცა საკუთარი ვარაუდები აქვს.
„არ შეიძლება შიგნიდან ამხელა სკანდალი ატყდეს, რა თქმა უნდა, გარედან მართული პროცესებია. ვახსენე ეკლესიის მტრები, მზაკვრული გეგმა, რომელიც ვიღაცისთვის ლამაზად მიმდინარეობს, თორემ ფაქტობრივად ადამიანები, მრევლი, საზოგადოება აღშფოთებულია და მე პირადად განადგურებული ვარ ამ ყველაფრიდან”, - განაცხადა ოხანაშვილმა.
მისი თქმით, როგორც უსაფრთხოების სამსახურის ყოფილმა ხელმძღვანელმა, ძალიან ბევრი რამ იცის, რაც საპატრიარქოში ხორციელდებოდა.
„მაგრამ ამაზე საუბრისგან მე დღეს თავს შევიკავებ. მაგრამ დადგება ამის დრო, როცა ყველაფერს ვიტყვი", - განაცხადა ოხანაშვილმა.
