სტუდენტურმა მოძრაობა „აუდიტორია 115-მა“ თსუ-ის მეექვსე კორპუსი დატოვა. გადაწყვეტილება სტუდენტებმა მას შემდეგ მიიღეს, რაც დღეს პარლამენტმა „უმაღლესი განათლების შესახებ“ კანონში შესატანი ცვლილებათა კანონპროექტი დაარეგისტრირა.
„ერთ წლიანი ბრძოლის შემდეგ ჩვენ მივაღწიეთ შეთანხმებას საქართველოს განათლების კომიტეტის თავმჯდომარესთან. ქალბატონმა მარიამ ჯაშმა დაარეგისტრირა ცვლილებათა პაკეტი, რომლის ძალაში შესვლის შემდგომ საფაკულტეტო საბჭოში სტუდენტებს აირჩევენ პირდაპირი წესით. შეგახსენებთ, რომ აქამდე მხოლოდ სტუდენტური თვითმმართველობის წევრებს შეეძლოთ საფაკულტეტო საბჭოებში შესვლა. სტუდენტებს თანაბარი წვდომა ექნებათ უნივერსიტეტის ფინანსებზე, სტუდენტური ინდივიდუალური თუ ერთობლივი ინიციატივების მხარდასაჭერად“, - აცხადებს „აუდიტორია 115“
სტუდენტებმა ასევე განაცხადეს, რომ „ბრძოლას უკეთესი უნივერსიტეტისთის“ გააგრძელებენ - „იმედს ვიტოვევბთ, რომ აღნიშნული შეთანხმება ყველა მომდევნო საფეხურს წარმატებით გაივლის და საბოლოოდ ახალი კანონი უზრუნველყოფს სტუდენტთა თანასწორობას“.
სტუდენტური მოძრაობა „აუდიტორია 115-მა“ პროტესტის ნიშნად უნივერსიტეტის მეექვსე კორპუსი 2016 წლის 23 ნოემბერს დაიკავა. მოძრაობის წევრები აცხადებდნენ, რომ უნივერსიტეტის კორპუსს იქამდე არ დატოვებდნენ, სანამ „უმაღლესი განათლების შესახებ“ კანონში შესატან ცვლილებათა პროექტი პარლამენტში არ დარეგისტრირდებოდა.