ყაზბეგის რაიონის, სოფელ სნოში მცხოვრებმა ოცდახუთმა ოჯახმა საქართველოს პარლამენტსა და პრეზიდენტს პეტიციით მიმართა. მოსახლეობა ყაზბეგის რაიონში დაგეგმილი 500-კილოვოლტიანი ელექტროგადამცემი ხაზის მშენებლობისთვის ალტერნატიული მარშრუტის შემუშავებას მოითხოვს. ამის შესახებ ინფორმაციას „მთის ამბები“ ავრცელებს.
მათი საკარმიდამო ნაკვეთები ე. წ. ბუფერულ ზონაში, მაღალი ძაბვის ელექტროგადამცემი ხაზიდან 30 მეტრის რადიუსში ხვდება. მოსახლეობა მიიჩნევს, რომ 500-კილოვოლტიანი ელექტროგადამცემი ხაზისთვის ალტერნატიული მარშრუტის შერჩევა შესაძლებელია და ის პროექტის ღირებულებას მნიშვნელოვნად არ შეცვლის.
„მთის ამბების“ ინფორმაციით, სნოში მცხოვრებ 25 ოჯახთან ერთად პეტიციას ხელს აწერს სოფელ კარკუჩასა და ახალციხეში მცხოვრები კიდევ 125 ადამიანი. პეტიცია პარლამენტსა და პრეზიდენტის ადმინისტრაციაში უკვე შევიდა.