ჰავაის შტატის ხელისუფლება გეგმავს, დონალდ ტრამპის ბრძანების შესაჩერებლად, რომელიც 6 მუსლიმური ქვეყნიდან მიგრაციის შეზღუდვას გულისხმობს, ფედერალურ სასამართლოს მიმართოს.
ოფიციალური პირები აცხადებენ, რომ მათი მოთხოვნა დროებითი შემაკავებელი ორდერის მიღება იქნება. თავდაპირველი სარჩელი, რომელიც ჰავაიმ სასამართლოში შეიტანა და რომელიც ტრამპის ბრძანებას უპირისპირდება, შეჩერებულია.
მიმდინარე კვირაში ტრამპის ადმინისტრაციამ ახალი ბრძანება გამოსცა, რომელმაც იანვარში გამოცემული ბრძანება გააუქმა. ახალი ბრძანება 90-დღიან შეზღუდვას აწესებს აშშ-ში მიგრაციაზე - ირანის, ლიბიის, სირიის, სომალის, სუდანისა და იემენის მოქალაქეებისთვის. ახალ ბრძანებაში შეზღუდვა არ ვრცელდება ერაყის მოქალაქეებზე, ამასთან, იგი მხოლოდ ახალ სავიზო განაცხადებს ეხება.
„ახალი ბრძანება შედარებით ნაკლებ ადამიანს ეხება, ვიდრე წინა" - ამბობს ჰავაის შტატის წარმომადგენელი ადვოკატი CNN-თან ინტერვიუში, თუმცა, მისივე თქმით, ახალი ბრძანება ისეთივე კონსტიტუციურ და სამართლებრივ ხარვეზებს შეიცავს, როგორც წინა.