"ერთიანი ნაციონალური მოძრაობის" ერთ-ერთი ლიდერი რომან გოცირიძე ბათუმში განვითარებული მოვლენების შეფასებისას აცხადებს, რომ შეუძლებელია ამ ფორმით და ასეთი აგრესიით გამოსულიყო ხალხი ქუჩაში, რომ არა ერთი მხრივ გაჭირვება, მეორე მხრივ ხელისუფლების მხრიდან პროვოცირება.
"ხელისუფლებამ ფაქტობრივად დაანგრევინა ბარბაროსებს ბათუმის ცენტრი. როცა ამბობენ რომ პროპორციულად გამოიყენეს ძალა, ძალის პროპორციულად გამოყენება ნიშნავს რომ ძალა არ უნდა გადაამეტო მაგრამ სადაც საჭიროა უნდა იმოქმედო. 5 საათის განმავლობაში სათარეშოდ მისცეს ნიღბიან პროვოკატორებს დრო რომ ქალაქი დაერბიათ და შემდგომ პოლიტიკური მოწინააღმდეგეებისკენ გაეშვირათ ხელი.
შედეგი არის ის რომ გადამწვარია ქალაქის ცენტრი, ორგანიზატორები გაიქცნენ. გამოავლინონ დამნაშავე. გამოავლინონ ვინ არის ღოღობერიძე რომელიც ანტითურქული და პროვოკაციული ლოზუნგებით გამოდიოდა რამდენიმე დღის წინ როცა ამბობდა რომ თითქოს პატრული თათრებს უწოდებს აჭარელ მოსახლეობას. რატომ არ არის ეს პროვოკატორი დაჭერილი? იმიტომ რომ ეს იყო შიდაკლანური დაპირისპირება. აჭარაში ძალოვნებმა ვერ გაიყვეს თავიანთი მმართველობის სფერო. მაგრამ ვითარება გაექცათ ხელიდან, -" ამბობს რომან გოცირიძე.
