2016 წელს საქალაქო და რაიონულმა სასამართლოებმა ნარკოტიკულ დანაშაულში (სსკ 260-174-ე მუხლები) ბრალდებულ 4 432 პირზე გამოიტანეს განაჩენი. ჯამში, 2016 წელს სასამართლოებმა განაჩენი სულ 16 064 პირთან დაკავშირებით გამოიტანეს. შესაბამისად, ნარკოდანაშაული მთლიანობაში განხილული საქმეების 27.5%-ია.
„ლიბერალის“ მიერ უზენაესი სასამართლოდან მიღებული ინფორმაციის თანახმად, მათგან 2 680 (60,4% ) პირზე განაჩენი საპროცესო შეთანხმების საფუძველზე გამოიტანეს, ხოლო არსებითი განხილვით -1 752-ზე (39,5%).
ნარკოდანაშაულისთვის ბრალდებული 4 432 პირიდან მხოლოდ 18 (0.4%) გამართლდა, ხოლო 4 222 (95%) მსჯავრდებულია.
192 პირზე კი აღნიშნულია, რომ საქმე განხილულია სასჯელის დაუდებლად, რაც ნიშნავს იმას, რომ პირი გამტყუნდა, თუმცა სასჯელი არ შეეფარდა (აღნიშნული საქმეები უკავშირდება მარიხუანასთან დაკავშირებით საკონსტიტუციო სასამართლოს გადაწყვეტილებას).