„უნდა მოიძებნოს ალტერნატიული გზა იმისათვის, რომ ადამიანების საკმაოდ დიდი ჯგუფი სერვისის გარეშე არ დარჩეს. მზად ვართ, იუსტიციის სამინისტროსთან ან სხვა უწყებებთან ერთად ვიფიქროთ ამ საკითხის გადაწყვეტაზე“, - აცხადებს ID ბარათებთან დაკავშირებით იურიდიულ საკითხთა კომიტეტის თავმჯდომარე ეკა ბესელია.
„ვიცი, რომ სწორედ ამ თემით დაინტერესებული იყო მინისტრი, ცოტა ხნის წინაც მქონდა მასთან კომუნიკაცია“, - განაცხადა ბესელია გადაცემა „იმედის დროსთან“ საუბრისას.
მოქალაქეების ჯგუფი ალტერნატიული პირადობის მოწმობების დაშვებას მოითხოვს. „საქართველოს პატრიოტთა ალიანსმა“ სასამართლოსაც მიმართა მოთხოვნით, ცვლილება შევიდეს იუსტიციის მინისტრის მიერ გამოცემულ ნორმატიულ აქტში და მოქალაქეებს მიეცეთ არჩევანის უფლება, აიღონ ე.წ. „ჩიპიანი“ თუ ქაღალდის პირადობის მოწმობა.
რეჟისორ ზაზა ნანობაშვილის ინფორმაციით, სასამართლოს ამ მოთხოვნით პირადად მოქალაქეებიც მიმართავენ.
„როდესაც ქვეყანაში რაღაცას ერთპიროვნულად, უალტერნატივოდ აკეთებ, ეს არის მხარეობა და რომ რაღაცის პროპაგანდას ეწევი... ქვეყანა არ არსებობს მსგავსი, რომ ადამიანს არ დაუკმაყოფილონ და მოქალაქებრივი პროცედურები შეუწყვიტონ... არ შეიძლება რომ ადამიანს ალტერნატივა არ მისცე, გინდაც იყოს ჩამორჩენილი, გინდაც იყოს ფანატი და ა.შ... სასამართლოში ჩივიან პირადად ადამიანები. პირადად შეიტანეს [სარჩელი]. სასამართლოსც არ აქვს უფლება, რომ ადამიანებს პენსიის აღება აუკრძალო ან რაღაც საბუთი არ მისცე. უკრაინაშიც, რელიგიური მოტივაციის გამო, არა მარტო მოქალაქის პირადი ბარათი არსებობს, არამედ საზღვარგარეთის პასპორტიც გაიცემა... და მათ ჩამორჩენილად საკუთარ ქვეყანაში არც რადა მიიჩნევს, არც მინისტრი და ა.შ", - ამბობს ნანობაშვილი.
