არასამთავრობო ორგანიზაცია „ოჯახები დისკრიმინაციის წინააღმდეგ“ ხელმძღვანელის მარი კორკოტაძის თქმით, აუტისტური სპექტრის მქონე 36 ბავშვის საკითხთან დაკავშირებით გუშინ მერიის ჯანდაცვისა და სოციალური მომსახურების საქალაქო სამსახურის უფროსს, გელა ჩივიაშვილს შეხვდნენ.
კორკოტაძის ინფორმაციით, შეხვედრაზე მათ განუცხადეს, რომ დაფინანსდებიან მხოლოდ ის ბავშვები, ვინც თბილისის მკვიდრია, ვინც საზღვარგარეთიდან სამშობლოში დაბრუნდა და ვინც სამშობიარომ დედის რეგისტრაციის ადგილს მიაწერა.
„დარჩნენ ის ბავშვები, რომლებიც რეგიონიდან 2 წლის განმავლობაში გადმოეწერა. დაახლოებით 10 ბავშვზეა საუბარი. მათ მერია არ დააფინანსებს. ეს იყო საბოლოო გადაწყვეტილება. ამ ბავშვებს რეგისტრაციიდან 2 წლის შემდეგ ჩასვამენ პროგრამაში. ისიც მომლოდინეთა სიაში, გაურკვეველი ვადით. ეს ბავშვები კარგავენ ძალიან მნიშვნელოვან დროს. 2 წელი ეს არის დაკარგული დრო. მათ ართმევენ იმ შესაძლებლობას, რომ წავიდნენ ბაღებში, სკოლებში, ჰქონდეთ ღირსეული ცხოვრება. ამას აკეთებს სახელმწიფო. დღეს მოვედით კანცელარიის შენობასთან. ესაა ორგანო, რომელიც პასუხისმგებელია გაეროს შშმ პირთა კონვენციის შესრულებაზე“, - აცხადებს კორკოტაძე.
დღეს მთავრობის ადმინისტრაციასთან აუტიზმის მქონე ბავშვების მშობელთა აქცია იმართება. ისინი მთავრობის ადმინისტრაციის ადამიანის უფლებათა დაცვის სამდივნოს ხელმძღვანელ ნატალია ჯალიაშვილთან შეხვედრას მოითხოვენ, წინააღმდეგ შემთხვევაში, შიმშილობის დაწყებას არ გამორიცხავენ.
„რადგან მერიისგან ვერანაირი შედეგი ვერ მივიღეთ, ვერაფერს ვერ მივაღწიეთ, ამიტომ აზრი არ ჰქონდა ისევ მერიასთან აქციის გამართვას, ამიტომ მოვედით კანცელარიასთან, რომ მთავრობამ გვიპასუხოს - ვინ არის პასუხისმგებელი ამ ბავშვებზე. თუ ისინიც გვეტყვიან, რომ ვერ აიღებენ პასუხისმგებლობას ამ ბავშვებზე, მაშინ მოგვცენ საბუთი, რომ ისინი ვერ არიან პასუხისმგებლები და ჩვენ იძულებულნი ვიქნებით, წავიდეთ სხვა ქვეყანაში, სადაც მოვითხოვთ თავშესაფარს; იმ ქვეყანაში, სადაც აფასებენ და პატივს სცემენ შშმ პირებს და ბავშვის უფლებებს. დღეს დავიწყეთ აქ აქცია; ვაპირებთ საღამომდე გაჩერებას; თუ საჭირო იქნება, დავიწყებთ შიმშილობის აქციას; არსად არ მივდივართ აქედან, თუ არ შეგვხვდება ვინმე სახელმწიფო კანცელარიიდან", - აცხადებს აუტიზმის მქონე ბავშვის მშობელი.
