პარლამენტის თავმჯდომარის ირაკლი კობახიძის ინფორმაციით, საკონსტიტუციო ცვლილებების პროექტის წინასწარი ვერსია უახლოეს მომავალში იქნება მზად, - ამის შესახებ მან საერთაშორისო კონფერენციაზე - „საკონსტიტუციო რეფორმა საქართველოში" გამოსვლისას განაცხადა.
„ჩვენ უკვე რამდენიმე თვეა, ძალიან აქტიურად ვმუშაობთ საკონსტიტუციო რეფორმაზე და ძალიან მნიშვნელოვანია, რომ ეს პროცესი წარიმართოს და დასრულდეს სათანადო შედეგით. მნიშვნელოვანია თავად პროცესი, რომლის საფუძველზეც მზადდება საკონსტიტუციო ცვლილებები და მეორე თვითონ ამ ცვლილებების შინაარსი. როდესაც სახელმწიფო საკონსტიტუციო კომისია შეიქმნა, პარლამენტმა მას დაუსახა ორი ძირითადი მიზანი. პირველი ეს იყო კონსტიტუციის სრულ შესაბამისობაში მოყვანა კონსტიტუციური სამართლის ფუნდამენტურ პრინციპებთან, მეორე კი - ქვეყნის გრძელვადიანი დემოკრატიული განვითარებისთვის ძალიან მყარი კონსტიტუციური ფუნდამენტის ჩაყრა“, - განაცხადა ირაკლი კობახიძემ.
პარლამენტის თავმჯდომარის თქმით, გამომდინარე იმ დოკუმენტის ხარისხიდან, რომელიც მომზადების პროცესშია, შეიძლება ითქვას, რომ საკონსტიტუციო კომისია ძალიან ახლოს არის იმ მიზანთან, რომელიც პარლამენტმა დააკისრა.
მისი თქმით, კონსტიტუცია არ არის დოკუმენტი, რომელიც რამდენიმეწლიან პერსპექტივაზეა გათვლილი და ის რისკების პრევენციას გრძელვადიან პერსპექტივაში უნდა ახდენდეს.
„დღევანდელ კონსტიტუციაში ძალიან უხეში ფორმით დარღვეულია ხელისუფლების დანაწილების პრინციპი, რაც ხაზგასმით იყო აღნიშნული ვენეციის კომისიის დასკვნაში 2009 წელს. შესაბამისად, ერთ-ერთი მთავარი მიზანი საკონსტიტუციო რეფორმისა არის ისეთი კონსტიტუციური სისტემის ჩამოყალიბება, რომელიც გრძელვადიან პერსპექტივაში თავიდან აგვარიდებს ავტოკრატიის ჩამოყალიბების საქმეს. ის დოკუმენტი, რომელიც ახლა მზადდება საკონსტიტუციო კომისიაში, არა მარტო ახდენს პრევენციას ასეთი საფრთხისა, არამედ გრძელვადიან პერსპექტივაში ავტოკრატიის ჩამოყალიბების ყოველგვარ რისკს გამორიცხავს“, - განაცხადა ირაკლი კობახიძემ.